AMED - Grevê vêşanîye ke hîrê hepsîyê cinî seba îhlalkerdişê heqan, zîndanê Tîpê E yê Mêrdînî de dabî destpêkerdiş dewam keno.

 

Elîf Denîz, Ronahî Sirdaş û Melek Evrene yê ke zîndanê Tîpê E yê Mêrdînî de hepsî yê, vera îhlalkerdişê heqan ê zîndanan hîrê rojî dest bi çalakîya grevê vêşanîye bêdem û bêageyrayîş kerdî. Hepsîyê cinî dîyar kerdî ke mudiro newe ke tayînê zîndanî bîyo, baxçe û serê lingan de hûmartiş ferz keno. Îhlalkerdişê heqan û cezayê hucreyî zêde bîyê û vatî ke vera nê dest bi grev kerdê. Avûkatê Ronahî Sirdaş, Şerzan Yelboga ard ziwan ke di rojî verê bi muvekîle xo dir pêvînayîş kerdo û muvekîle ci rewşa ke yena ciwîyayîş qal kerda.

 

'Di rojan ra reyke awa germine danê'

 

Şerzanî da zanayene ke wextê vîrusî de zîndanan de teda zêde bî, la Mêrdînî nê tedayî tewr zêde bîyê û wina vat: "Heme zîndanan de prosesê pandemî de babeta pakiqî de îqazkerdiş yenê kerdene.  La Mêrdîn de na rewşe vuryena. Semedê her koxuşe bi 45 deqe mabêne awe yena dayene. Heta bîdonan danê hepsîyan û vanê awe pirr bike. Seranserê roje awa bîdonan xebitnenê. Di rojan ra reyke awa germe yena dayene. Zîndanê Mêrdînî de bi tu hewa goreyê metodê pandemî tênêgeyrenê."

 

'Yan baxçe de yan zî serê lingan de hûmartiş kenê'

 

Şerzanî ard ziwan ke pandemî xeylêk zîndanan de vila bîyo û wina vat: "La Mêrdîn de îdarekar nê rê baldar nêbeno. Yan hepsîyan erzenê baxçe yan zî serê lingan de hûmartiş ferz kenê. Mêrdîn de hîrê hepsîyê cinî vera nê vejênê û îtîraz kenê. Muvekîla ma Ronahî seba îtîrazî rastê serrêke cezaya hucreyî û di serî zî pêvînayîşê bi keyeyî dir ameye. Hepsîyê bîn zî senîn na ceza ameye tesdîqkerdene, destbi grev kerdî."

 

Hepsîyan ra vengdayîşê hîsgêrî

 

Şerzanî tewr peyîn qiseykerdişê xo de vat, cinîyan veng da heme raya pêroyî û vat: "Hîrê hepsîyê cinî, netîceyê tewr giran nêvejîyê werte, dest bi grevê vêşanîye kerdî. Seba ke no tecrîd bêro wedaritene, wa her kes vengê înan bido eşnawitiş û hîsgêr têbigeyrê."