WAN - Aktîvîst û sîyasetmedaran reaksîyon vera hêrişê dewleta tirkî ke bi SIHAyî bi sebebê qetilkerdişê 3 cinîyan û vatî: “Hedefê şerê bêhuqûq de yeno kerdene de cinî estê. La do têkoşînê cinîyan, Şorişê Rojawanî rê rayberî kerdî dewam bikero.”

 

Netîceyê hêrişê dewleta tirkî ke 23ê Hezîrane de bi teyareyê bê merdim (SIHA) vera dewa Helîncî yê Kobanî de kerdî, endama Koordînasyonê Herêma Firatî ya Kongreya Star Zehra Berkele, Îdarekara Kongreya Starî ya Herêma Şeranî Hebûn Mele Xelîl û dayîka endama Koordînasyonê Kongreya Starî Mizgîn Xelîle, Emîne Muhammed Wesîye ameyî qetilkerdene. Vera nê cinîyan reaksîyon ramojna.

 

‘Têkoşîn do her ca de dewam bikero’

 

Hemsereka Partîya Demokratîkî ya Şaran (HDP) ya Wanî Oznur Bartine, dîyar kerde ke şero lêşin ê vera kurdan ameyo destpêkerdene dewam keno û her cayê ke kurdî tede ciwîyenê hêriş yenê kerdene. Oznure dîyar kerde ke Tirkîya de qirkerdişê cinîyan roj bi roje zêde beno û wina vat: “Ma vînenê ke qetilkerdişê cinîyan ê Kobanî netîceyê şerê bêhûquqî ke yeno kerdene yo. Yeno waştiş ke cinî bêrê bêvengkerdiş. La do têkoşîn her ca de dewam bikero. Cinîyê ke şoriş kerdî do têkoşînê xo her ca de dewam bikerê. Ma hêrişan bi şîdet şermezar kenê.”

 

‘Qirkerdişê cinîyan her cayê dinya de bîyo problem’

 

Sereka Komeleya Cinîyan a Starî Serap Guvençe zî wina vat: “Şîdetê serê cinîyan êdî problemêko dinyayî yo. Hem herême û hem zî Tirkîya de şîdetê serê cinîyan zêde beno. Şer beno sebebê merdişê bi hezaran cinîyan. Ma nê şerî û nê hêrişan şermezar kenê.”

 

‘Vera qirkerdişan do têkoşîn dewam bikero’

 

Hemsereka HDPyî ya qezaya Rayîrê Armûşî Canan Uzunaye zî wina vat: “Ma cinîyê HDPyî vera nê hêrişan bêveng nêmanê û ma do vengê xo berz bikerê. Têkoşînê ma yê vera qirkerdişê cinîyan û vera şerî do dewam bikero.”