WAN - Cinîyan dîyar kerdî ke tecrîdê hemverê Rayberê PKKyî Abdullah Ocalanî de prosesê vîrusê korona de zî dewam kerdo û bêhuqûqî zî dewam kerdo û vatî: “Hêrişê hemverê Mexmûr û Şengalî parçeyek tecrîdî yo. Ganî bêro wedaritene.

 

Tecrîdê serê Rayberê PKKyî Abdullah Ocalanî Îmrali de 21 serrî yo bi hewayêko sîstematîk dewam keno. Semedê şiktişê tecrîdî zî heta nika xeylêk çalakî û bername bi ca ameyî. Çalakîya tewr hîra ê serrê peyînan zî çalakîya grevê vêşanîye ê hepsîyan bî. 8ê Adara 2018 de bi rayberîya parlamentera HDPyî Leyla Guvene zîndanê Tîpê E yê Amedî çalakî ameye destpêkerdene û pêro zîndanan de vila bî. Netîce de 30 hepsîyan çalakîya xo vurna rojeyê mergî. Netîceyê têkoşînê 200 rojî de tecrîd ame şiknayene, 8 serrî dima 2ê Gulana 2019 de pêvînayîş avûkatan dir ame kerdene. 22ê Gulane, 12-18 hezîrane û 7ê Tebaxe de dewam kerd û dima ra reyna tecrîd kewt dewre. Abdullah Ocalanî tewr peyîn 27ê Nîsane de yewin rey keyeyê xo dir telefon de qisey kerd.

 

Şertê vîrusê korona de tecrîd dewam keno û şarê Kurdî wazeno ke Îmralî ra zanayîş bigîro.

 

‘Hêrişê hemverê Mexmur û Şengalî parçeyêk tecrîdî yo’

 

Sabîha Tamure da zanayîş ke tecrîd şexsê Abdullah Ocalanî de ser şarê Kurdî yeno kerdene û wina vat: “Hêrişê hemverê Şengal û Mexmûrî parçeyêko tecrîdî yo. Nêwazenê şarê Kurdî destkewtiş bi dest bikerê û coka destûr nêdanê pêvînayîşê ke bi Abdullah Ocalanî dir bêrê kerdene. Ma wazenê Rayberê ma dir pêvînayîş bêrê kerdene. Bêguman pêvînayîş heqê Rayberê ma yo zî. Ma cuyêka azad û aştîye wazenê. No zî Abdullah Ocalan bi ca ano.”

 

‘Ma rewşa rayberê xo meraq kenê’

 

Bedrîye Tamure zî şertê zîndanî vera vîrusî bêasayîş ê û wina vat: “Ma wazenê aştî bêro nê welatî. Abdullah Ocalan Rayberê ma yo. Bi hezaran kes pey ey de rayîr şono. Hizûrê welatî bi wedaritişê tecrîdî mimkun o. Ganî pêvînayîşê bi Ocalanî dir bêrê kerdene. Ma rewşa Rayberê xo mereq kenê. Ma tecrîd qebûl nêkenê.”

 

‘Ganî heme hepsî bêrê veradayene’

 

Behîye Tîmure zî ard ziwan ke ganî tecrîdê hemverê Abdullah Ocalanî û hepsîyê sîyasî peynî bibê û wina vat: “Tecawizkar, dizdî û kiştoxî bi qanûnê înfazî dir serbest ameyî veradayene. La hepsîyê sîyasî nêameyî veradayene. Ma wazenê pêro hepsî serbest bêrê veradayene. Azadî Îmralî ra derbaz bena.”

 

Zulfîye Demîre zî reaksîyon vera qanûnê înfazî da û vat: “Hepsîyê sîyasî qanûn de ca nêgirewtî. Sere de Abdullah Ocalan û pêro hepsî serbest bêrê veradayene. Ganî pêvînayîşê bi Ocalanî dir bêrê kerdene. Şar meraq keno û ci ra zanayîş paweno.”