AMED - Endama Meclîsê HDPyî ya Rezanî Evîn Yelboga dîyar kerd ke dewlete bi teda û zordarî serê sazgehê cinîyan wazenê têkoşînê cinîyan krîmînalîze bikerê û ard ziwan ke vera nê polîtîkayan ganî cinî pîya têkoşîn bikerê û rêxistinê xo xurt bikerê.

 

Hêrişê serê sazgeh û xebatê cinîyan her ke şênê zêde benê. 22ê Gulane de operasyonêko merkezî Amed de ame destpêkerdene û mîyan de endamê TJAyî, endam û îdarekarê Komeleya Cinîyan a Rosa zî bî, 18 kes ameybî tepiştene û 12 kesî ameyî tepiştene. Dimayê nê oparasyonî reyna bi fermanê Serdozgerîya Komara ya Amedî de tehqîqat dîyabi destpêkerdene û 7ê Hezîrane de sereştişê keyan de endama Komeleya Cinîyan a Rosa Suzan Îşbîlen û Gulîstan Nazliere zî tede 6 kesî ameyî destbendkerdene. Gulîstan Nazliere ameye tepiştene û Suzan Îşbîlene zî bi şertê kontrolê edlî serbest ameye veradayene. Reyna sereştişê keyan de Endama Meclîsê Şaredarîya Şaristanê Girdî ya Amedê Ceylan Aslane û Aktivîsta TJAyî Jiyan Taşe ameyî tepiştene. Endama meclîsê Cinîyan a Partîya Demokratîkî ya Şaran (HDP) ya Rezanê Amedî Evîn Yelboga derheqê nê çîyan de ercnayîş kerd.

 

‘Ma her roje bi xeberanê kiştişê cinîyan wirzenê we’ 

 

Evîne vat kiştişê cinîyan xeylêk bîyo zêde û vat: “Kiştişê cinîyan hende zêde bîyo ke komelî rê bîyo çîyêk bi rêz. Ma her serê sibayî xeberanê derheqê kiştişê cinîyan wirzenê. Her roje cinî hetê pîyanê xo ra, birayanê xo ra yan zî hetê camêrdanê xo ra yenê qetilkerdene. Komelo serdest ê camêrdan goreyê waştişê xo rolê cinîyan dîyar kerdo ke û no zî hetê bi zewacê emrê domanîye de şono. Ganî cinî vera nê ferasetî têkoşîn bikero.”

 

‘Bi nê hêrişan wazenê xebatanê cinîyan krîmînalîze bikerê’

 

Evîne dewam de wina vat: “Nika cinîyê ke hemverê dişminîyê cinîya têkoşîn bikerê benê hedef. Hêrişê vera aktivîstanê TJA, endamê Komeleya Cinîyan ya Rosa û Endama Meclisê Cinîyan ê HDPyî derheqê vera têkoşînê cinîyan o. Bi nê hêrişan yeno waştene ke nê sazgehan îllegalîze bikerê. La reyna zî têkoşînê ma dewam keno. Sewbîna nê prosesî de seba krîzê ekonomî vetişê karî zêde bîyo û no zî tewr zêde tesîr serê cinîyan keno. Nê ser o mexdûrkerdişê cinîyan zî xebatê Komeleya Rosa estbî û cinîyan dir kewtêne têkilî.”

 

“Kerdox hêzê xo dewlete ra gêno’

 

Evîne da zanayene ke kerdoxî hêzê xo dewlete ra gênê û vat: “Kerdoxî seba ke dewlete ra paştrast ê û zanê ke do nêrê cezakerdene bi asanî cinîyan kişenê. Temamê dinya de cinî yenê qetilkerdene la Tirkîya de no kiştiş bi destê dewlete ra yeno meşrûkerdene. Îqtîdar ke hêrişê cinîyan keno, bi taybetî têkoşînê cinîyanê kurdan hedef gêno. Cinîyê kurdî bi nê polîtîkayanê dewlete fek têkoşînê xo ra vera nêdanê. La hewcedarîyê cinîyan bi têkoşînêko rêxistin kerde esto.”