MÊRDÎN - 2013 de Mîdyat de cinîya bi nameyê Nurcan Fîdane (20) bi tecawizê qorîcîyêk dir rî bi rî mende û dimayê hedîse întîxar Nurcane rê amebi ferzkerdene û peynîya cuya xo ardibî. Serê hedîse ra 7 serrî derbaz bi. Dayîka Nurcane, Rifa Fîdane da zanayene ke ê 7 serrî yo edalet qîrenê û vat: “Kênaya mi gor de ya la êyê ke bî sebebê nê teber de geyrenê. No edalet nîyo, ma edalet wazenê.

 

Dewa Xanika ya Mîdyatê Mêrdînî de 2ê Temmuze 2013 de cinîya bi nameyê Nurcan Fîdan (20) întîxar kerde. Nurcane ke bi tecawizê qorîcîyo A.Î dir rî bi rî mendebî, dima ra keyeyê xo de bi tifingê seydwanî peynîya cuya xo ardbî. Keyeyê Nurcane 7 serrî yo edalet geyreno. Dayîka Nurcane, Rifa Fîdane da zanayene ke pêwa ke di rey muracatê sucî kerdi zî reyke zî gumanbar nêameyo tepiştene û serê hedîse ameyo girewtene û 7 serrî hesiran varnena. Kesê ke bîyê sebebê kiştişê kênaya aye zî her roje bi wesayîtan verê keyeyê aye ra derbaz benê.

 

‘Êyê ke tecawizê kênaya mi kerdî teber de geyrenê’

 

Rifa wina qisey kerde: “Kênaya mi di rey remnayî. Ma fam nêkerd ke çi ardî sereyê aye. Ma hema fam nêkerdib ke çi bîyo, kênaya mi vat, ez nêeşkena bi nê şermî biciwîyî. Bi tifing xo kişt. Verê hedîse vatêne nînan bi mi xirabî kerd. Dimayê ke kênaya mi dinyaya xo bedilna, ma derheqê înan de di rey muracatê sucî kerd. La çîyêk nêbi. Kênaya mi 7 serrî yo gor de ya, ma zî dejê aye ancenê.”

 

‘Bi serran o bendeyê edaletî ya’

 

Rifa, tewr peyîn da zanayene ke bi serran o bendeyê edaletî ya û wina vat: “Kênaya mi xo kişt, labelê êyê ke bî sebebê ci cuya xo dewam kenê. Her roje ganê mi dejeno. No çîyo ke ame kerdene merdimayî nîyo. Serrî derbaz bî, pêwa gerreyê ma reyke zî nêameyî tepiştene. Ez tena canê edalet wazdna. Waştişêko min o bîn çin o. Kênaya ma înan ver xo kişt. Wa sucdarî ceza biancê.”