AMED - Merdimanê vindîbîyayeyan, aqûbetê Haci Ahmet Erî verê 25 serrî destbendkerde de ame vindîkerdiş, persayî.

 

Merdimanê vindîbîyayeyan û Şubeyê Komeleya Heqê Merdiman (ÎHD) ya Amedî bi sloganê, "Wa vindîbîyayeyî bêrê vînayene û kiştoxî bêrê muhakemekerdene' hewteyê 593 de çalakîya xo serê medya komelî de kerdî. Temsîlkarê ÎHDyî yê herême Abdusselam Înceorenî, eşkerayî da û aqûbetê Haci Ahmet Ero ke 15ê Temmuza 1995 de destbendkerde ame vindîkerdene, pers kerd.

 

Hîkayeyê 25 serran

 

Abdusselamî, hîkayeyê vindîbîyayîşê Haci Ahmetî bi nê vatişan vat: "15ê Temmuza 1995 de dewa Kurudere de operasyon yeno kerdene. Operasyon de şer mabêne leşker û PKKyijan de vejêno. Fermandarê leşkerî yê operasyon ray beno, dewijan ra wazeno ke dewijî keyeyê xo veng bikerê, eke veng nêkerê zî do fermanê gulerişnayîşî bidê leşkeran. Dimayê demêk leşkerî erzenê serê keyeyan. Lajê Haci Ahmet Er, Adnan seba ke keyeyê xo veng bikero, şono dewa cîranê xo Blêcan ke estoran bîyaro. Wexto ke Adnan şono, mabêne di dewan de vengê sîlehan yeno. Pîyê ci Haci Ahmet Er û birayê xo Haci Mîrap Er dimayê Adnan şonê dewa Blêcanî. Leşkerê ke kewtê operasyon Er û birayê ci destbend kenê û benê qereqola dewa Serêsêve. Haci Mîrap Erî rê qereqole de îşkenceyo giran yeno kerdene, çend roj ra dima bi şertê dewa xo terk bikero serbest veradayî. Keye fikrîyeno ke do Haci Ahmet Erî zî bêro veradayîş. La Hacî Ahmet Er nîno veradayîş û reyke bîn bi tu hawayî zanayîş ci ra nîno girewtene. Keye seba ke aqûbetê Haci Ahmet Erî vejîyo teber gerre keno. Verê nê hewldayîşê keyeyê zî, tu netîce nêkeweno dest. Hacî Ahmet Er bi 25 serrî yo vindbîbîyaye yo û aqûbetê ci nîno zanayene.