Medya Uren

 

AMED - Fatma Budak û Zozan Budake dewa Goçxwarî ya qezaya Lîcê de bi keyeyê xi dir zîyanan ramnenê. Fatma dîyar kerde ke wextêko derg o, ê nê karê ramitişî kenê û vat: "Ramitiş parçeyêko cuya ma yo. No kultur û debara ma yo."

 

Cinî bi geşkerdişê kulturî û dayîşê kede cu bi mana kenê. Coka no têkoşîn, seba agêrayîşê cuya xoza ya. Şarê serê herra Mezopotamya ke bi ramitiş pîl bîyê, nê kulturê xo dewam kenê. Şaristanê Amedî de zî yew nê merkezê ramitiş û pesdewarî yê tewr bi berardiş o. Welatîyê dewa Goçxwar, Zengê, Licok, Balîçne û Mişirfî yê ke girêdayê qezaya Lîcê ê Amedî yê taybetî debara xo bi ramitişê tutinî kenê. Xeylê keyeyî serê siba rew wirzenê û nê zîyanan de dest bi karê xo yê rojane kenê. Nê keyeyan ra yew zî keyeyê Fatma Budak (50) û Zozan Budaka (23)  ke aye û domanê xo pîya seba ramitişî ameyê.

 

'Nê dewan de herre bi bereket a'

 

Ver bi koyanê Lîcê de xeylêk dewa ke yewbînan dir dûr û wayîrê welatîyê tay ê. Serê sibayî de cinîyê ke xo dayê verê tijî asenê. Hema vajê pêro dewijî bi ramitişê tutinî dir eleqedar benê û ramitişo tewr namdar no yo. Keyeyê Fatma, bi şefeqî dir dewêka ver bi dewa Goçxwarî de ameyê. Seba debara xo bikerê, zîyan bi kîra girewtê û danê xebitnayîş. Fatma, seba persa ma ameyîşê aye tîya wina cewab dana: "Dewa ma de awe çin a, coka ma dewa xo ra yenê na dewe."

 

'Ma ramitiş ra hes kenê'

 

Fatma wina qal kerde: "Ramitiş, parçeyêk cuya ma yo. Her ke yeno vîrê mi, ma nê karan dir eleqedar benê. Coka ma nê karan ra peyser karêk bîn nêzanê. No kar seba ma debar o. Serê şefeqî ra heta şan de ma xebityenê. Verê tîja germ de bêvindertiş, ma kar kenê. Ma benê rincan la girîngîyê ramitişî ma rê zêde yo. Ma nê karî ra hes kenê"

 

'Ma heqê keda xo û kîraya zîyanê xo nêvejênê'

 

Tewr peyîn Zozan Budake wina va: "Ma nika ra dest bi ramitiş kenê, ver bi payîzî de zî ma ramitiş kenê û berardişê xo kom kenê. Tewr zêde tutin yeno ramitiş. Tutino ke ma bi dest kerdo ma roşenê. La ma heqê keda xo û kîraya zîyanî nêvejênê. Bifikrîyê ma serê sibayî ra xebityenê. Tutino ke ma amade kenê, mîyanbeynkar yenê ma ra gênê. Tutinê ma erjan ma ra gênê û bi di qatê ma roşenê. Mîyanbeynkar ma ra zafêr qezenc kenê.