Ronîda Hacî 

 

HESEKÊ - Wedha Yasîna ke bi keda destê xo tenûran viraznena û kulturê kan dewam kena û wina vat: "Mi tenûre seke hunerêke weçîna ke ez kulturê dayîk û dapîranê xo gane bikerî, dewe bi boya nanê tenûre weş û geş bikerî."

 

Kulturê xozayî yê viraştişê tenûran, ewro bi rayberîya cinîyan yeno ganekerdene. Viraştişê tenûran mîyanê xo de kede û herre paweno. Bi keda cinîyan nanê tenûre, dewa bajarê Hesekî de yeno viraştene. Cinîya bi nameyê Wedha Yasîne 40 serrî û bajarokê Tiwênî yê girêdayê bajarê Hesekî yê kulturê xo yê kan wayîr vejêna û  tenûre bi keda destê xo viraznena. Wedha derheqê viraştişê tenûre ewnîyeyîşê xo pare kerd.

 

'Seba viraştişê tenûre kedêke pîl lazim a'

 

Wedha dewam de wina vat: "Seba ke ma bieşkê nanê tenûre viraznê, lazim o ma tenûre awan bikerê û viraştişê tenûre zî herra sûr, awe, sole û mûyê bizinan yena viraştene. Seba viraştişê tenûrê kedêka pîl lazim a Tenûre 10 tebeqeyan ra yena viraştene û gilor yena viraştene."

 

'Boya nanê tenûre dewe weş û geş kena'

 

Wedha tewr peyîn wina qal kerd: "Bi 4 serrî yo mi dest bi viraştişê tenûran kerdo, ez viraştişê tenûre dayîk û dapîra xo ra mûsaya. Boya nanê tenûre dewe weş û geş kena. Eynî wextî de zimistanî de seba viraştişê goştî, germkerdişê awe zî tenûre de yenê xebitnayene. Tenûre eynî wextî de derûdorê merdiman telî û vaşê ziwa pak kena. Gama ke ma nanê tenûre viraznenê, domanî verê tenûre de kom benê û nan wazenê. Bi weşbîyayîşê viraştşê nanî, bi kombîyayîşê domanan û waştişê înan ê seba nan, cu hîna weş bena. Bi keda cinîyan kulturê dayîk û dapîranê ma gane beno."