STENBOL - Îdarekara HDPyî ya Stenbolî Eylem Dogana ke pêvînayîşê Sîlîvrî yê ‘Rayrayîşê Demokrasî yê Vera Darbeyî’ de hetê polîsan ra erd ra amebî kaşkerdene û seba ka nêro destbendkerdene xo ver da û polîsan rê peyser game da eştiş. Eyleme da zanayene ke hêzê xoverdayîşî cinîyan ra girewto û vat: "Ma do bi faşîzm, tacîzkaran û yê ke şîdet bi ca anê, peyser game bidê eştiş."

 

‘Rayrayîşê Demokrasî yê vera Darbeyî’ ke HDPyî 15ê Hezîrane de Edîrne û Colemêrgî de da destpêkerdene, Sîlîvrî û Wan de bi hêrişê polîsan dir rî bi rî ame. Hêrişan de xeylêk kesî erd ra ameybî kaşkerdene, derbkerdene û destbendkerdene. Stenbol de zî verê Merkezê Dayîş û Girewtişî yê Sîlîvrî de şar ame têhet û polîsan uca de hewl dabi ke Îdarekarê HDPyî Stenbolî Eylem Dogane destbend bikerê. La Eyleme vera nê xo ver da. Serê nê de bi desan polîsan hêrişê Eyleme kerdî, erd ra kaş kerdî û dayî piro. La Eyleme fek xoverdayîşê xo ra vera nêda û polîsî mecbûr mendî ke peyser bi ancê.

 

'Bi taybet verê xo dayî cinîyan' 

 

Eyleme dîyar kerdî ke seranserê rayîr de bi astengîyan dir rî bi rî mendî û wina va: "Bi taybetî zî hêrişê cinîyan kerdêne. Ma bendeyê  hemsereka pêroyî ya HDPyî Pervîn Buldane bî. Ware pêroyî kerdî binê abluqa. Dorê ma padayî. Korîdor ameyî awankerdene. Wesayîtê destbendkerdene ardî ware. Heme kesan girewtî binê abluqa. Ma zî va, ma ware veng nêkenê, ma rayrayîşê xo kenê. Na mabêne de ez zî masaya ke parlamenterî roniştebî de mendêne. Verê xo dayî ma. Vatî masa ra wirzê. Seba ke ma nêwiştî, ma rê mudaxele kerdî. Bi taybetî verê xo dayî cinîyan û dayî ma ro."

 

'Mi xoverdayîşê cinîyan ramojna'

 

Eyleme dewam de da zanayene ke nêzdîyê 10 polîsan dayî pê ro û hewl dayî ke destbend bikerê û wina va: "Mi zî xoverdayîşê cinîyan ramojna. A roje de di rey verê xo dayî ma. A roje bi destê cinîyan, hêrişê vera cinîyan estbi. Bi destê cinîyan, şîdet cinîyan rê kerdî."

 

'Hewl dayî ke harmeyê mi bişiknê'

 

Eyleme da zanayene ke polîsêko camêrd hewl dayo ke harmeyê ci bişiknê û wina va: "Mi di rey hêrişî dir rî bi rî mendî, la ma xo ver da û coka mecbûr mendî xo peyser bi ancê. La bi çiman tacîz kerdî. Ez ware ra nêvejîyaya. Vizêr ma senîn xo ver da, ma do ewro zî xo ver bidê. Ez hêzê xoverdayîşî cinîyan, rêxistinbîyayîşê cinîyan ra gêna."

 

'Xoverdayîş serkewtiş ano'

 

Eyleme tewr peyîn qiseykerdişê xo de da zanayene ke HDP partîyêka cinîyan a û wina qedêna: "Ma cinîyê HDPyîjî hêzê xo rêxistinê xo ra gênê. Sebebê peyser eştişê game polîsan, rêxistinbîyayîş û hêzê cinîyan bi. Uca de nê dî. Xoverdayîş, serkewtiş ano. Ma vera faşîzm, tacîzkerdoxan û yê ke şîdet bi ca anê, peyser game nêerzen."