Şehrîban Aslan

 

AMED - Gullu Yilmaza ke hetê Can Yilmazî ra amebî qetilkerdene û derheqê gumanbarî de bi waştişê muebeto giran û heta 20 serran cezaya zîndanî, dewa ameye akerdene.

 

Erganîyê Amedî de 17ê teşrîna verêne 2019 de camêrdo bi nameyê Can Yilmaz (35) cinîya xo Gullu Yilmaze (33) qetil kerdib. Gulluye, nêweşxane de 12 rojî ra dima dinyaya xo bedilna. Domana Gulluye zî wextê hedîse de birîndar bî. Can Yilmaz zî 11 rojî ra dima ame tepiştene.

 

Dozgerîya Komara ya Amedî zî sucên ‘bi çimsûrî qestî cinîya xo kiştiş' bi waştişê cezaya muebeto giran û 13 serran ra heta 20 serran cezaya îdianame amade kerd. Îdianame hetê 7in Dadgeha Cezaya Giran ya Amedî ra ame qebulkerdene.

 

Roniştişê yewin 14ê êlule de bêro vînayene. Merkezê Heqê Cinîyan ê Baroya Amedî waştiş kerd ke beşdarê dewa bibo. Avûkat Gevrîye Atliya ke bi dosya Gulluye dir eleqeder bena, derheqê prosesî de qisey kerde.

 

Tedbîrî qels ê 

 

Gevrîye, dîyar kerde ke Gulluye verê ke bêro qetilkerdene, rastê şîdetî ameya, di rey muracat kerda la gumanbarî dosyayan ra ceza nêgirewto û Gulluye verê her di tehqîqetan zî stargeh de menda û va: "Gumanbar seba Gulluye îqna bikero soz dayo, stargeh ra veta û berda keye. Eke stargeh de tedbîr biameyne girewtene, do wina nêbibayîne."

 

'Gelo kam ci banyoyê keyeyî de benzîn esto?'

 

Gevrîye dewam de wina va: "Gelo kam ci keye de banyo de benzîn esto? Seba nê sebebî zî bi hawayêko eşkere yeno vînayene ke kiştiş ameyo plankerdene. No kiştiş wina reyke de nêbîyo. O bîn zî waşto ke di domananê bînî zî bierşawo teber. Gulluye ra vato, ma probleman qisey bikerê. La kêna pîl e keye de bîya. Nê fikrê gumanbarî tena ramojneno ke cînayet plan kerdo. Gulluye nêweşxane de polîsan ra vana, ‘mêrdeyê mi mi veşna.' Polîsan nê eşnawito, seke şahid şîyê dadgeh."

 

'Gumanbarî hewl dayo ke kêna xo zî qetil bikero'

 

Gevrîye bale ante serê îfadeyê gumanbarî û vat, gumanbarî îdia kerdo ke cinîya xo ra vato, mexebite û pêwa nê aye zî vato ez xebityena û vat: "Bi nê îfadeyan hewl da ke xo xelas bikero. Gumanbarî senîn Gulluye qetil kerd, hewl da kêna xo zî wina qetil bikero. Derheqê nê de zî dozgerî ‘teşebusê kiştişî ra' dewa akerd. Dimayê hedîse, dozgerî bi lez tehqîqat da destpêkerdene. Rewşê normal de Cezaya Asliyî de dosya wina bi lez bi netîce nêbenê."

 

'Welayetê domanan pî ra ame girewtene'

 

Gevrîye da zanayene ke Dadgeha Huqûqî ya Asliyeyê ya Erganî de waştişê wedartişê welayetê domanan ê pî, qebûl kerdê û dadgehe zî qerarê welayetî wedarito û dima ra do bidê dayîka Gulluye.