ŞIRNEX - Nuran Îmîra HDPyije reaksîyon vera hêrişê Maxmûr û Şengalî da û wina vat: "AKP bi polîtîkayê xo yê teberî û zereyî keno de dişminîyê kurdan keno. AKP kiştoxê cinîyan o û hemverê aştîyêka mende de asteng o."

 

Teyareyê şerî yê Tirkîya ser o vizêr nîmeyê şewe de Wargehê Şehîd Rûstem Cudî (Mexmûrê) û Şengal bi hawayêko hemwext de bombavaran kerdî. Parlamentera Şirnexî ya Partîya Demokratîkî ya Şaran (HDP) Nuran Îmîre derheqê hêrişan de ercnayîş kerde û vat ke ê do vera hêrişan têkoşîn bikerê.

 

Nurane, va ke ê seke HDPyî key vajê azadî û demokrasî AKP û dewleta tirkî vera înan şer dana destpêkerdene û wina vat: "Ma çiqas babeta azadî û aştîye de israr kenê, AKP hem tebera û hem zî zere de şer vejeno. La do HDP her wext vera zulmî têkoşînê xo dewam bikero. No proseso ke HDPyî dest bi rayşîyayîş kerd, hêrşê ke serê herêmanê kurdan de ameyî kerdene tesaduf nîyê. Ganî prosesê rayşîyayîşo ke ma kerd de hêrişê ke ameyî kerdene, mesajêk o. Belê, mesajê ma zî dîyar o, ma seke HDPyijî vera zulmî û darbe yê û ma do bi şarê xo dir têkoşîn bikerê."

 

'Polîtîkayê dişminî yenê kerdene'

 

Nurane arde ziwan ke welatîyê Maxmûrî seba hêrişê dewleta tirkî koçber bîyê û şîyê Mexmûr û cuyêka newe awan kerdê labelê dewleta tirkî înan uca de zî rehet nêverdana û her wext hêriş kena û wina vat: "Dewleta zulimkar û DAÎŞî seserra 21ê de hêrişê Şengalî kerd. Vera nê hêrişan şarî sere nêtewêna. Ma hêrişê ke ewro reyna serê Şengalî de yenê kerdene qebul nêkenê. Ewro hem Rojhelatê Mîyanên û hem zî heme dinya vera kurdan polîtîkayê dişminî yenê kerdene û wargeha Mexmûrî ke ganî wayîr ci rê vejîyê, verê çimê komelî de dewleta tirkî hêrişê ci kena. Îqtîdarê AKPyî meşrûbîyayîşê xo vindî kerdo û xo bi şer serê lingan de verdeno. AKP bi polîtîkayê ke hem teber û hem zî zere de keno, dişminîyê xo yê vera kurdan eşkera keno. AKP kiştoxê cinîyan, domanan û cinîyanê Mexmûrijan û Şengalijan o. Ma ne Maxmûr û ne zî cayêk bîn de hemverê hêrişanê înan de sere nêtewênayo."