ŞIRNEX - Cinîya Dengbêja Dewa Elemûnî ya Qilebanî Beyaz Olmeza ke bi 7 serrî yo dengbêjî kena, arde ziwan ke a wayîrê kulturê xo vejêna û wina va: "Çîyo ke merdimî serê lingan de verdeno kultur o."

 

Dengbêjî hênîyêko kulturê Kurdî yo. Xizmetêko pîl averşîyayîşê komelî rê kerdo. Rayberîya nê çî cinîyan kerdo. Cinîyê dengbêjî yê kurdî kulturê ma yê dewlemend heta ewro ardê. Dengbêja bi nameyê Beyaz Olmeze (38) a ke dayîka 6 domanan a, dewa Elemûnî ya qezaya Qilebanî ya Şirnexî de ciwîyena, kulturê dengbêjî pawena. Beyaza ke heme kar û barê keyeyî serê milê aye de yo cuya xo dewe de dewam kena. Beyaze, xêrcê kar û barê keyeyî zî dengbêjî kena.

 

'Bi nêzdî yo 7 serrî yo dengbêjî kena'

 

Beyaze da znaayene ke mîyanê keyeyî de pîyê aye verê dengbêjî kerdo û wina va: "Xêrcê pîyê mi, mîyanê keyeyî de kesê ke dengbêjî bikero çin o. Gama ke ez qij bîya, baş yeno vîrê mi, dengbêjan deyîranê xo vatêne. Cinîyê dengbêjî veyve û şewa heneyî de kilamê xo vatêne. Demê verê de xeylê zêde dengbêj estbî û ma zî goşê xo dayîne înan û înan goşdarî kerdêne. La nika seke verê dengbêjî çin ê. Ez zî bi 7 serî yo dengbêjî kena. Mîyanê komelî de veyve û şewa heneyan de deyîran vana."

 

'Ma kurdî bi serran o bindest ê'

 

Beyaze, dewamê qiseykerdişê xo de wina va: "Wexto ke pîyê mi dengbêjî kerdêne, mi goşdarî kerdêne. Ez bi nê rengî dengbêjî mûsaya. Xeylê dengbêjê bi name û veng goşdarî kena. Ez bi taybetî deyîranê verê vana. Kesê dengbêjî dej, keder, weşî, koçberî, bindestî bi deyîranê xo anê ziwan. Ma kurdî bi serran o bindest ê. Omidê ma oyo ke ma Kurdî cuyêka weş û azad biciwîyê."

 

'Çîyo ke merdimî serê lingan de verdeno kultur o'

 

Beyaze tewr peyîn wina qalî kerde: "Ma bi serran o dejê xo bi deyîranê xo anê ziwan. Eke no kulturê ma çin bibo, ma do senîn dej, elem û kederê xo bîyarê ziwan? Wa heme kes wayîrê dengbêjî vejîyo. Ganî ma cinî bi dengbêjîye xo û deyîranê xo û kulturê xo bipawê. Ma nêverdê ke vindî bibo. Çîyo ke merdimî serê lingan de verdeno kultur o."