AMED - Pêwa destpêkerdişê prosesê normalbîyayîşî, tehlukeyê vilabîyayîşê vîrusî dewam keno. Cinîyê ke Sûrê Amedî de ciwîyenê, hemverê nêpakkerdişê kuçeyan de reaksîyonê xo ramojnayî û veng dayî selahîyetdaran û wina vatî: "Ma veng danê û vanê wa kuçeyan pak bikerê û eynî wextî de ganî welatî zî pakkerdişê xo û derûdorî ra baldar bê."

 

1ê hezîrane ra dima temamê Tirkîya de prosesê 'normalbîyayîş' ame destpêkerdene. Bi destpêkerdişê prosesî de ters û endîşeyê mîyanê şarî de zêde bi. Goreyê Mudirîyê Weşîye yê Amedî, şaristan de bi hezaran kesî nika karantînayî de yê. Welatîyê ke Sûrê Amedî de ciwîyenê, hemverê bêtedbîrbîyayîşê welatîyan gerreyox ê û vatî ganî welatî hemverê vîrusî pakitîyê xo û derûdorê xo ra baldar bê.

 

Cinîyê ke Sûr de ciwîyenê, dayî zanayîş ke kuçeyê Sûrî nînê pakkerdene û welatî zî girîngî nêdanê pakitî û no çî rayîr ver bi tehlukeyan akeno. Cinîyan veng da selahîyetdaran û vatî, ganî kuçeyî bêrê pakkerdene.

 

'Pakitî ra baldar bê'

 

Aynûr Kaya ke qezaya Sûrî de ciwîyena va ke ganî merdim pakîtî rê baldar bo û va: "Çi heyf, kuçeyê ma xeylê xo wina lêşin ê. No zî seba vilabîyayîşê vîrusî ma keweno endîşeyan. Seba ke sey her cayî Ame dû Sûr de zî nêweşîya vîrusê korona esta. Lêşinîyê kuçeyan ma tersneno. Reyan kuçeyan pak kenê, reyan zî nêkenê. Ganî welatî tay bîn zî hetê pakkerdişî de baldar bê û çopê xo nêerzê kuçeyan."

 

'Ma do wayîrê kuçeyanê xo vejîyê' 

 

Zehra Barane zî reaksîyon vera lêşinî da û va: "Ma veng danê selahîyetdaran û vanê kuçeyanê Sûrî pak bikerê. Rojê vîyarte de Amed de hûmara nêweşîya korona zêde benê û no zî tersê merdimî zêde keno. Vîrûsê korona, derûdorê ma kerdo binê abluqa. Seba ke dewlete rewşa normalbîyayîşî îlan kerde û coka şarê ma zî bê tedbîr geyrenê û nika rewşa Amedî xeylêk tehluke de ya. Sewbîna çopê ke erzenê kuçeyan zî rayîr vera tehdîdê vilabîyayîşê vîrusî akeno. Şarê ma zî wa çopê xo nêerzo her ca. Ma wayîrê kuçe û meydananê xo vejîyê."