ŞIRNEX - Resama ciwan Besna Acune pêwa heme astengî û zehmetîyanê xo viraştişê resimî musa. Besna, dîyar erde ke gama ke merdim bi qerar bo, merdim eşkeno her çî bikerê.

 

Besna Acûne 19 serrî ya û bi eslê xo Cizîrê Şirnexî ra ya. Nêzdîyê 4 serrî yo resim dir eleqedar bena. Besna hem eleqeyê aye bi muzîkî dir esto û hem zî resimî dir esto. La bi taybetî xo hetê xêzkerdişê resimî dir aver berde. Besna hewl dana ke figurê kulturê Mezopotamya û Botanî xêz bikero.

 

Besna, qiseykerdişê xo de bale ante serê hunerê xo û wina va: "Wextê pêrodayîşê Cizîrî de mi dest bi xêzkerdişê resimî kerd. Mi bi îmkananê xo resiman xêz kerd, la xebatêka hende profesyonel nêbî. Resimê ke mi reya ewil mi xêz kerdibî, mi nimtî. Dimayê ke mi mamosteyêk ra hetkarî girewt, ez çend teknîkan musaya. Mi waşt ke xo aver berî, mi dest bi amadekarîyê beşê hunerî yê unîversîte kerd. Ez nika unîversîteya Êlihî beşa hunerî sinifa 3ine de ya."

 

'Xêzkerdişê hîsan girîng o'

 

Besna, qalê xêzkerdişê hîsan wina ard ziwan: "Gama ke merdim resiman xêz keno, ganî hîsê mîyanê komelî têbigeyro. Ez bi taybetî resimanê kulturî yê herêmî xêz kena. Ez serê na herre de pîl bîya û coka ez o her wext resimanê xo de kulturê Mezopotamya û Botanî bîyarî ziwan. Wextê şerê Cizîrî de mi bi taybetî resimê sîya, çek, tank û topan xêz kerdêne."

 

'Nika dêsan de resiman xêz kena'

 

Besna, dîyar kerde ke keyeyê ci qetî paştdayîş nêdayo xêzkerdişê aye û wina va: "Keyeyê mi çiqas bi asteng zî mi qebul nêkerd û mi xo ver da. Gama ke merdim bi qerar bo û bi wao merdim eşkeno serkewte bo. Nika fikrê keyeyê mi vuryayo û paştdayîş danê mi. Gama ke ez kulturê Botanê xêz kena, keyeyê mi zî kêfweş beno. Mi prosesê vîrûsê koronayî de zî resiman xêz kerd. Nika zî ez teber de dêsanê kafeterya û dikanan xêz kena." Besna tewr peyîn qisyekerdişê xo de bale ante serê amancê xo û wina va: "Ez wazena bibî resama serkewte. Ez veng dana cinîyan ke wa wayîrê hunerê xo vejîyê."