MÊRDÎN - Mîdyat de cinîya bi nameyê Şenaz Urune bi hewayêko guman, cuya xo vindî kerd. Platformê cinîyan ê Şahmaranî yê Mêrdînî reaksîyon ramojna û va: "Ganî ma cinî vengê xo berz bikerê."

 

Mêrdîn de di hewteyê peyîn de hîrê cinî bi hewayêko guman cuya xo vindî kerdî û yew ci ra zî bi çek ameye birîndarkerdene û beşê giran ê Mêrdînî de ya. Tewr peyîn 6ê Hezîrane de Mîdyatê Mêrdînî de taxa Selhê de cinîya bi nameyê Şenaz Urune (19) bi hewayêko guman dinayaya xo bedilna. Keyeyê aye cenazeya aye dî û derheqê merdişê bi guman ê Şenaze de cigêrayîş ame destpêkerdene.

 

Derheqê Şenaze de îdiayê cîya ameyî vatene û ame vatene ke Şenaze 6ê Hezîrane de peynîya cuya xo arda. Goreyê zanayîşê ke keyeyî ra ameyî girewtene, cenazeya Şenaze hetê pîyê aye ra ameya vînayene.

 

Endamê keyeyî îdia kerdî ke ganî nê prosesî de tu problemê Şenaze çinbîyo û meymanê ke şîyê şîn zî seba persa ‘çira peynîya cuya xo ard?' cewabê ‘Ma zî nêzanê tu problemê aye çinbi' girewtî. Cenazeya Şenaze morg ra ameye girewtene û goristanê taxe de ameye definkerdene.

 

Cîrananê keyeyî ra yewe dîyar kerde ke Şenaze 17 serrî de ameya zewicnayene û dimayê demêk nêvejîyaya teber û tu kesî dir têkilîyê aye çinbîyo. Cîrane da zanayene ke dimayê ke leşkerî ameyî taxe, merdişê aye bi gumanî musayê.

 

Platformê cinîyan ê Şahmaranê yê Mêrdînî dîyar kerdî ke di hewteyê peyîn de şaristan de hîrê cinî bi hewayêko guman cuya xo vindî kerdê û vat: "Hêrişê vera cinîyan her ke şono giran beno. Ma cinî, ma do vengê xo berz bikerê. Derheqê na babete de ma do xebatan bikerê û reaksîyonê xo ramojnê."