AMED - Lîsa Çalana ke bî şahidê teqîyayîşê 5ê Hezîrane û di lingê aye tira bî, arde ziwan ke dimayê teqayîşî tu çîyêk cuya aye de nêbîyo seke verê û la aye qetî omid û bawerîya xo vindî nêkerda û wina va: “Ganî pêro şarê Amedî wayîrê dewaya xo vejîyê. Çunke o hêriş şarê Amedî rê ame kerdene.”

 

5ê Hezîrana 2015 de mîtîngê, "Merdimayîya Girse" a Partîya Demokratîkî ya Şaran (HDP) Meydanê Îstasyonî yê Amedî de hêrişê bomba amebi kerdene û netîce de 5 kesan cuya xo vindî kerd. 400 kesî zî birîndar bî. Serê hêrişî ra 5 serrî derbaz bi û cezaya muebetî semedê versucan ameye dayene. Hêrişê bombayî de yew kesa ke birîndar bî Lîsa Çalan bî. Lîsa, qalê çîyanê ke dimayê hêrişî cuyaya û averşîyayîlê dewaya xo ercna.

 

‘Tu çîyêk nêbi seke verê’

  

Lîsa wina qalî kerden: “Dimayê 5ê Hezîrane Pirsûs, Enqere, Dîlok de zî teqayîş ameyî meydan. Mi prosesêko tesîr serê pêro cuya mi kerd, derbaz kerd. Tena cuya mi ney, cuya keyeyê mi û embazanê mi zî vurna. Ez seke koçerêke êdî ciwîyayîne. Ez welatêko ra derbazê welatêko bîn, nêweşxaneyêko ra derbazê nêweşxaneyêko bîn bîne. Hema vaje ez heme nêweşxaneyanê dinya geyraya. Birînê mi yê ke ganî ez heta peynîya emrê xo ci dir eleqedar bibî estê. Heta peynîya emrê xo ez o dermanan bixebitnî. Xeylêk çîyê ke mi vîr kerdêne ez bikerî, nika nêeşkena bikerî. Ez mecbûr a cuya xo goreyê di linganê mekanîk dewam bikerî. No qet asan nîyo.”

 

‘Na dewaya ma pêrûne ya’

 

Lîsa arde ziwan ke prosesê dewa hema dewam keno û wina va: “Dewa, Enqere de ameyne vînayen. Pêwa nê ez beşdar bîne. Semedê ez ramojnî înan ke ê nêeşkenê ma bikşê, nêeşkenê peynîya ma bîyarê, ez şîya eywana dadgehe. Polîsî hema Amed de yenê muhakemekerdene. Na babete de lazimîyê ma bi paştdayîşêko girs esto. Ganî pêro şarê Amedî, taqîbkerdoxê na dewa bibê. Na dewa ma hemin a. Eke kesê ke kerdê cezaya ke heq kenê bigîrê ma do rehet bibê.”

 

‘Tu çîyêk nêbê seke verê la mi omidê xo vindî nêkerd’

  

Lîsa tewr peyîn wina qalî kerde: “Ma azadî û demokrasî xeylêk pey xo de verda. Ma her roje bi rijyayîşêko aya bî. Êdî dîyar nîyo ke do key çi bibo. Helbet ma omidê aştî zerrîya xo de pawenê û têkoşîn kenê. Tu çîyêk nêbi seke verê la mi omidê xo vindî nêkerd. Hêrişê 5ê Hezîrane, Dîlok, Pirsûs û Enqere tena vera şarî ney, eynî wextî de vera demokrasî, aştî û azadîye bi zî. Pêwa heme çî ma hewl danê serê lingan de bimanê. Ma bi keyeyanê Pirsûs û Enqereyî dir zî mîyanê paştdayîş de yê. Semedo ke do qetî birîna mi aşt nêbo coka ez o qetî nê çîyê ke qewîmyayî xo vîr ra nêkerî. Her ke bêro vîrê mi ez o tewr zêde xo ver bidî.”