MEXMÛR - Dayîkê Mexmûrî derheqê ambargoyê Mexmûrî ya ke bi 11 mengî yo dewam keno de ardî ziwan ke rewşa ke şono tewr zehmet beno û vatî: “Ma wazenê ganî ambargoya serê ma de peynî biba.”

 

Ambargoyê serê Mexmûrî bi 11 mengî yo dewam keno. Welatîyê Wargehê Şehîd Rustem Cûdîyî (Mexmûr) binê şertanê xidar de hewil danê ke cuya xo dewam bikerê. Derheqê babete de dayîkê Mexmûrijî şîrove kerdî.

 

‘Xeylêk kesî nêeşkenê şêrê nêweşxane’ 

 

Dayîka bi nameyê Xanê Benege arde ziwan ke ambargoyê serê Mexmûrî bêedaletî yê û wina vat: “Wexto ke ma koçber bî û ameyî na kampe seba rewşêka zaf xidar bî. Nika zî bi mengano ambargoyêk serê ma de esto. Xeylêk kes nêeşkenê şêrê nêweşxane û xeylêk kes zî nêeşkenê debara xo bikerê. Hetêk ra zî bombayan serê ma de varnenê. Xeylêk zulm ma rê yeno kerdene la kesêk nê zulmî rê vengê xo nêvejeno. Semedê nêweşîya xo mi waşt şêrî nêweşxane la seytarê PDKyî cilê mi cilê mi tira kerd û ez peyser agêraya. O wextî ra ez nêweş a û erd de ya. Ma dewa xo dir girêdayeyê. Tu hêz yan zî kes nêeşkeno game ma ra peyser bido antene. Heta dilopêk gonî ganê ma de bibo ma do pey rêbertî û şehîdanê xo bê.”

 

‘Ma omid kenê her kes vera nê ambargoyî vejîyê’

 

Dayîka Adilê Bîlene wina va: “Tay mendo serrêk derbaz bibo ke ambargo serê ma de ya. Ma komelêko multecî yê. Bi 27 serrî yo ma mîyanê şertê multecîyan de ciwîyenê. Omidê ma pêro partîyanê kurdan ra esto ke vera nêheqî bêveng nêmanê û bibê wayîrê helwest ke ambargoyê serê ma wirzo. Tîya de kesêk nêeşkeno bixebîtîyo û nêeşkeno şêro nêweşxane. Kurdistan ê ma pêrûne yo. Ma omid kenê ke her kes vera nê ambargoyî vejîyo.”