AMED - Parlementera HDPyî Remzîye Tosune îşkenceyo ke Mudirîya Asayîşî ya Amedî de bi M. E. Cyî ame kerdene, kirişna meclîs.

 

Qezaya Rezanî ya Amedî de 30ê nîsane de kuçeyê 718î yê taxa 5ê nîsane de polîsê bi nameyê Atakan Arslan amebî kiştene. Yeno îdîakerdene polîs îqazê vindere dayo ciwanê bi nameyê M.E.Cyî, la M.E. nêvinderto û wexto ke remayo gule reşênayo polîsan ser o. Hedîse de polîs Atakan Arslan bi hawayo giran birîndar bî û nêweşxaneyo ke wedarîya de cuya xo vindî kerd. Badê hedîse M.E.C ame tepiştene û polîsan ci berdî Mudirîya Asayîşî ya Amedî. Dima ra medyaya sosyalî de fotografê M.E.Cyî ke mudirîye de îşkence ci rê ameyo kerdene ameyî parekerdene.

 

Fotografo ke hesabêk Twitterî yê verfekê Parlementerê Mêrsînî yê MHPyî Olcay Kılavuz, Emre Soyluyî de ame parekerdene de yeno vînayene ke M.E.Cyî raştê îşkenceyî ameyo. Parlementera Partîya Demokratîke ya Şaran (HDP) ya Amedî Remzîye Tosune babeta îşkenceyî kirîşnaye meclîs û persnameyêk da Serektîya Meclîsî ke Hetkarê Serekkomarî Fuat Oktayî cewab bido.

 

Persname de yeno waştene ke Hetkarê Serekkomarî Fuat Oktayî cewabê nê persan bido:

 

“*Îdîayê binêçiman de îşkencekerdişê M.E.Cyî yê Mudirîya Asayîşî ya Amedî raşt o?

 

*Yeno îdîakerdene ke M.E.C raştê tecawizê bi copin ameyo û ci rê îşkence ameyo kerdene. Derheqê nê îdîayan de do cigêrayîşêk bêro kerdene?

 

*Eke nê îdîayî raşt bibî do ‘Goreyê Pêkerdişê Heqê Merdiman yê Ewropa ganî merdiman rê muameleyêko teberê merdimîye nêro kerdene’ derheqê selahîyetdaran de tehqîqat bidîyo dest pêkerdene?

 

* Kam û seba çi fotografê ke hetê verfekê Parlementerê Mêrsînî yê MHPyî Olcay Kılavuz, Emre Soyluyî de ameyî parekerdene da Soyluyî?

 

*Weşîya M.E.Cyî ke raşyê îşkence ame senî ya?”