EDÎRNE -  Tepişteyo nêweş Vefa Kartal Zîndanê Edîrne de dinyaya xo bedilna.

 

Tepişteyo nêweş Vefa Kartalo ke mabênê serranê 2017-2018î de pê waştişê tedawî rojeyê mergî û grevê vêşanîye kerdî Zîndanê Edîrne de dinyaya xo bedilnaye. Merkezê MED-TUHAD-FEDî derheqê babete de hesabê xo yê twitterî ser o eşkerayîyêke daye û vat: ''Vefa Kartal seba ke binpaykerdişê heqan biqedê qasê 96 rojan kewtbi grevê vêşanîye. La reyna pêro xîretî bênetîce mendî." Vefa Kartalî de nêweşîyê Hepatît B, prostat, tansîyonê berzî, ulser, alerjî estbî û 26 serran ra nata tepişte bi. La Kartalî nêamebi weşkerdene.

 

Vefa, nê semedî ra 18ê tabaxa 2017î de Zîndanê Îzmîrî de dest pê grevê vêşanîye kerdbi û roja 114. de çalakîya xo qedînabî. La no çax zî Vefa seba tedawî, holkerdişê şertanê zîndanî, qedîyayîşê binpaykerdişê heqan û tedayan dest pê rojeyê mergî kerdbi. Vefa çalakîya xo roja 96. de qedînabî.