MÊRDÎN - Yeno pawitene ke Santralê Enerjîyî yê Vayî (RES) Qoser û Şemrexî de nizdîyê 50 turbînanê vayî virazo. Komeleya Ekolojîye ya Mêrdînî ra Derya Akyole raporê projeyî ser de cigêrayîş kerde û dîyar kerde ke do no proje zirarêko gird bido cuya heme gandaran.

 

Yeno waştene ke ‘Projeyê Enerjîyî yê Vayî yê Dîcleres’ ke hetê Şîrketê Anonîmî yê Dîcleres Elektîrîkî ra ameyo hadrekerdene, Dêrik, Şemrex û Qoserî de bikero dewre. Heto bîn de derheqê babete de raporê ÇEDî zî pozîtîf bî. Yeno pawitene ke Dêrik de 37, Şemrex de 9 û Qoser de 4 pêropîya 50 turbînî bêrî viraştene. Endama Komeleya Ekolojîye ya Mêrdînî ra Derya Akyole dîyar kerde ke do no proje zirarêko gird bido cuya heme gandaran, beradiş, ekonomî û ekolojî ro.

 

‘Proje de raşteyê SÎTî zî estî’

 

Derya qiseykerdişê xo de daye zanayene ke raporê projeyî de qismêk gird ê Keleha Rabatî ke raşteyê SÎTî de ca gêno zî girîyayo projeyê turbînî û eke no proje bikewo dewre do rindîya tarîx û xozayî yê qezayan zî xira bikero û va: “Dêrik de Raşteyê SÎTî peymeyê yewine de yo. Yanî qismêk Keleha Rabatî û xerabe zî girîyayî raşteyê projeyî. Rapor de yeno vatene ke do Keleh û xerabe proje ra tesîr nêbî. Heto bîn de Parka Tabîatî ya Sulava GAPî zî girîyaya raşteyê projeyî. Her çiqas ke wina bêro vatene zî îhtîmalêk gird esto ke zirarê giran bidîyî nê cayan û heme gandaran.”

 

‘Do hewayê herême bibedilîyo’

 

Derya tewr peynî ard ziwan ke eke RES bêro viraştene do îklîmû hewayê herême bibedilîyo û wina qedênaye: “Proje do zirar bido heme tewir gandaran. 50 turbînê vayî do têgêrayîşê vayî asteng bikerî û hetê vayî bibedilnî. Do hewayê herême bibedilîyo. No zî do zirar bido berardişê herême. Dewijê herême bi tesîr bibî.”