Fîlîz Zeyrek

 

EDENE - Latîfe Aydina ke hem lajê ci, hem torn û hem zî birazayê ci tepişteyê, wina veng da: "Yê ke dişminîya şarê Kurdî kenê, ne edalet ne zî qanûnan goşdarî kenê. Ganî ma cuya domananê xo bipawê. Ganî ma veng bidê, vengê tepişteyan."

 

Vîrusê koronayî ra heta nika Tirkîya de 4 hezar û 397 kesî cuya xo vindî kerd. Zîndanan de hema zî tedbîrê baş nêameyê girewtene û hepsîyê sîyasî qanûnê înfazî de ca nêgirewtibî. Reaksîyonê keyeyan zî vera nê dewam kenê. Latîfe Aydine (80) dîyar kerde ke lajê aye 29, torn û birayê aye 26 serrî yo tepişte yê û arde ziwan ke çîyê ke bêrê ciwîyayene do AKP-MHP berpirsîyar bê.

 

'Semedê ke cuyêka bi rûmet waştî ameyî mahkumkerdene'

 

Latîfe dîyar kerde ke heta nika şîya bi desan zîndanan û wina va: "Lajê mi Aydin 29 seerî yo, tornê mi Mustafa Aydin û birazayê mi Suleyman Gultekîn zî 26 serrî yo û tepişteyê. Lajê mi zîndanê Tekîrdagî de maneno. Bi serran o, domanê mi bi sebeb zîndanan de yê. Semedê cuyêka bi rûmet waştî, ameyî mahkumkerdene û cuya înan destê înan ra ameya girewtene. No zulm o. Se kenê wa bikerê do game peyser nêerzê. Ma înan ra û tedayanê înan ra nêtersenê."

 

'Hêrişê bedenanê merdayan kenê'

 

Latîfe dîyar kerde ke tornêke ci têkoşînê azadîye de cuya xo vindî kerda û wina vat: "Ez dayîkêke ya. Domanê ke koyan û zîndanan de yê domanê ma pêrûne yê. Ez AKP-MHPyî ra vana: Şima bi desan tecawizkar û kiştoxan vera da. La kesê seba rûmetê xo xo ver dayî zîndanan de mendî. No edalet o. Ma heqanê xo wazenê. Bêguman do rojêke peynîya nê zî bêro. Şima do zî hesab bidê. Şima goranê domananê ma rijnenê. Şima hêrişê bedenanê merdeyan kenê. Nê qebul bikerî. Ma estê, ma nêqedênê. Her surgunî de ma şî zîndananê cîya. Ma cuyayîşêke bi surgun ciwîyenê. Ez veng dana heme kesan, wa wayîrê wijdanî bê. Veng bidê vengê hepsîyan.