MÊRDÎN - Platformê Demokrasî û Kede yê Mêrdînî, tepiştişê 12 sîyasetmedar û aktivîstê cinîyan şermezar kerd û vat: "Têkoşînê cinîyan bi teda û zordarîyan nêeşkenê vindarn. Ganî kesê ke ameyî tepiştene, serbest bêrê veradayene."

 

Platformê Demokrasî û Kede ya Mêrdînî, derheqê şîdetê hemverê cinîyan, operasyonê ke hemverê Komeleya Cinîyan a Rosa û aktîvîstê Tevgerê Cinîyanê Azadan (TJA) eşkerayîyêke dayî çapemenîye. Eşkerayîye awanîya Şubeyê Konfederasyonê Sendîkayê Kedkarê Îstîmlakî (KESK) ê Mêrdînî de ameye dayene. Endamanê platformî û parlamenterê Partîya Demokratîke ya Şaran (HDP) yê Mêrdînê Pero Dundar û Ebru Gunaye beşdarê eşkerayîye bî. Eşkerayîye hetê endama Meclîsê Cinîyan ê KESKî Gulîzar Îpeke ra ameye wendene.

 

Gulîzare, eşkerayî de bale ante serê tepiştişê 12 kesan û vat: "Cinîyê ke vera şîdetî têkoşîn kenê, her wext benê hedefê îqtîdarî. Îqtîdaro ke tecawizkarê domanan efû keno û destûr dano ke tecawizkarî mîyanê komelî de bigeyrê, mesajêko dano cinîyanê ke vera şîdet û hêrişan têkoşîn kenê. Bi operasyonan vano ke teda û zordarî tewr zêde bibo û sewbîna cayê cinîyan komelî de nêmaneno. Xebatê komelî yê ke çarçewaya qanûnî de bi ca ame, seke sebeb ameyî ramojnayene û ameyî tepiştene. Bi nê polîtîkayan wazenê komelî bêveng bikerê."

 

Gulîzare, dîyar kerde ke cinîyê ke bi şîdetî dir rî bi rî manenê, nê welatî de hetê hukmî ra seke sucdar yenê ramojnayene û wina vat: "Nika wareyê huqûqî de têduştî çin o û sîstem hemverê cinîyan xebityeno, sererastkerdişê nika yenê kerdene, cinîyan ceza keno. Ma vanê ganî cinî serbest bêrê verdayene. Ma hêrişê vera cinîyan bi tu hewa qebul nêkenê. Ma seke Platformê Demokratîk û Kede yê Mêrdinî waştişê serbest veradayene înan kenê."

 

Eşkerayîye bi sloganê, "Cinî Ciwîyayîş azadîye' peynî bî.