Şehrîban Aslan

 

ÊLIH - Dimayê ke qeyûm tayînê şaredarîya Êlihî ya HDPyî bi, Cinîyê Merkezê Ercnayîşê Cinîyan ê SELÎSî de xebityenê, dayî beşê bîn û semedê mudirîyê zî camêrd ame tayînkerdene. Hulusî Şahîno ke seke qeyûm ame tayînkerdene zî talîmat da ke cinî kuçeyan û refujan de bixebityê.

 

23ê Adare de semedê şaredarîya HDPyî ya Êlihî, qeyûm ame tayînkerdene û hedefo ewil ê qeyûm Merkezê Ercnayîşê Cinîyan bi. Cinîyanê SELÎSî xebityenê, ewil Mudirîyê Karsazî û dima ra zî Mudurîyê Park û Baxçeyan ame wezîfekerdene.

 

'Bi telefon zanayîş dayî'

 

Gulcan Demîr Arslana ke SELÎSî de xebityayîne, erşawitî Mudirîyê Park û Baxçeyan, dîyar kerde ke merkezê cinîyan ke wextê qeyûmî de amebi padayene, dimayê weçînayîşê herêmî yê 2019 ra dima reyna ameyo akerdene û kewto xizmet û vat: "Dimayê ke qeyûm ame ez vejîyaya destûr. Ganî nê prosesî de ez musaya ke di rey cayê wezîfeyê mi ameyo vurnayene. Vernê de ez daya Mudirîyê Park û Baxçeyan. Bi telefon geyrayî û vatî, nuşteyê şima ameyo vejîyayene."

 

'Problemê weşîye ame peygoşkerdene'

 

Gulcane arde ziwan ke verê tumor mezgê ci de bîyo, emelîyat bîya û hema problemê ci dewam kenê û vat: "Pêwa nê problemê cidî yê weşîye, qeyûm peygoş kerdî. Cayê mi vurnayî. Bi embazê ke cayê ma vurnayî dir roja çarşeme vendayî ma. Ma ra vatî ke ‘Talîmat ameyo ke şima do cade û refujan bixebityê.' Eynî wextî de reyna bi zanebîyayîş mudirê camêrd tayînê vera ma kerdî. Amancê nê zî oyo ke vernîya xebata cinîyan bigîrê."