MÊRDÎN - 40 dewanê Dêrik û Qoserî de bi 16 rojî yo DEDAŞî ceyran birnayî û awe çin a. Cinîyê ke vera nê têkoşîn kenê wina vat: "Ma nêeşkenê keyeyê xo pak bikerê û awe bidê heywananê xo. Ganî peynîya nê zulmî bidê."

 

40 dewanê girêdayê Qoser û Dêrikî bi hezaran welatî 14ê Gulane heta nika bê awe û ceyran cuya xo dewam kneê. Vilakerdişê Ceyranî yê Dîcle A.Ş bi îdiayê ‘deynê ceyranê yê citkaran’ esto ceyran ame birnayene û 16 rojî yo welatî mexdûr ê. Cinîyê dewa Sinarî dîyar kerdî ke bi tankêrê awe, dewa bîne ra anê û hewcedarîyan çareser kenê û vat, cilê înan pak nêmendê, ganî no problem bêro çareserkerdene."

 

'DEDAŞ her serre wina keno'

 

Medîne Turane da zanayene ke dewa bîne ra awe anê û vat: "Serra Remezanî her wext awe birnenê. Mîyanê Remezanî de bi pêroyî birnayî. Bi mengan o awe û ceyran çin o. Ma roşan wina derbaz kerd. Ma domanê xo nêşitî. Ma şonê dewanê bînan ra bi tankêran awe anê. O zî qîm nêkeno. Reyan awa ma ya werdî zî nêmanena. Êdî bes o. Ma her serre mexdûr benê."

 

'Tewr zêde cinî mexdûr benê'

 

Xensa Akça zî wina vat: "Şima rewşa ma vînenê. Ma perîşan kerdê. Tewr zêde cinî zehmetî ancenê. Ma awe ancenê. Nan danê pêro. Tutan rê ewnîyenê. Ceyran çin o. Hacetê ma yew nêxebityenê. Hacetê ma semedê ceyran şono û yeno, xira bî. Ma dewa bîne ra awe anê."

 

'Deynê ma çin o'

 

Xezal Bîlene zî wina vat: "Ma nêeşkenê firaqan bişu. Cil û belgê ma lêşîn o. Ma nêeşkenê awe bidê heywananê xo. Deynê ma çin o. Her kes mexdûr kerdî. Baxçeyê ma estê. Semedê ma awe nêdenê wişk bîyê. Şan de bi zanebîyayîş ceyranê ma akenê û hacetê ma xira benê. Ganî awe vera bidê. Wa çareserî bivînê."