Medya Uren

 

AMED - Halîse Aksoy û Netîce Çubuke Roşanê Remezanî de seba qedexeyan nêeşkenê şorê serdayîşê goristananê domananê xo û vatî: “Gelo kam ci dînî de, kam ci nîjadî de goristanî yenê xirakerdene û wêrankerdene. Dayîkî her roje eynî dejan ciwîyenê. Ne goranê ma rê ne zî dayîkanê ma rê rêzd gênê.”

 

Dayîkê ke domananê xo mîyanê têkoşînê azadîye de vindî kerdê, her serre roşan de şîne serdayîşê goristanan. La emsar seba vîrûsê koronayî bi pêroyî vejîyayîşê teberî ame qedexekerdene. Coka dayîkî nêeşkenê şêrê serdayîşê goristanan. Her roşan de dayîkî xemgîn ê û nê roşanî de zî tewr zêde xemgîn ê. Netîce Çubuke lajê xo Çekdar Çubukî mîyanê têkoşînê azadîye de vindî kerd û Cenazeya Egît Îpekî zî bi rayîrê korgoyî dayîka Halîse Aksoye rê ame eşrawitene. Dayîkan hîs û fehmê xo yê roşanî û nêşîyayîşê xo yê serê mezelan ajansê ma rê ardî ziwan.

 

Halîse Aksoye, destpêkê qiseykerdişê xo de bale ante serê rêzdarîyê dayîkê kurdan ser û va: “Domanê ma rayîrêko heq de serê herra xo de ameyî kiştene. Bedenê înan ê pîroz bi kargoyî ma rê yenê eşrawitene. Yan zî bedenê înan binê cadeyan de yenê nimtene. Ma roşan de dîmenanê winasî dir rî bi rî mendî. Ne goran rê ne zî dayîkan rê rêze nêgînê. Ma her wext rîyêko înan bîn vînenê. Çiqas ma bimusê zî eşkenê merdimayî şaş verdê. Seba ke nê nêzdîbîyayîşî vera merdimayî yê. Gelo kam ci dînî de, kam ci nîjadî de goristan yenê xirakerdene û wêrankerdene. La dayîkê ma reyna reyna nê çîyan dir dej ancenê. La ganî bêro zanayene ke waştişê înan ma çinkerdişî do qetî serkewte nêbo.”

 

‘Ma rê destûr nêdanê ma şêrê serê mezelanê xo’

 

Halîse dewam de wina va: “Ma nêeşkenê şorê serê mezelanê domananê xo. Ma rê destûr çin o. Seba ke ê xo gan vînenê ê ma zî çîyêk ra nêhesibnenê. Çiqas rêze şehîdanê ma rê bigîrê, hende wijdanê înan esto ke ewro çiqas zordestî serê dayîkanê şehîdanê kurdan ca anê, wijdanê înan zî hende yo. Ez xemgîn a ke nêeşkena şorî serê mezelê şehîdê xo. Domanê ma pawitoxê welat û merdimanê xo bî. Înan zulm û zordarî kesêk rê nêkerd û kesêk zî serrê herra înan de nêkişt. Ma nêeşkenê şêrê serê mezelanê înan la ma do reyna duayan domananê xo rê bikerê û roşanê înan bi zerrî ra pîroz bikerê. Ma do vajê qehremanê welatê xo, roşanê şima pîroz bo. Gerek ma ewro verê mezelê înan de bibayîne la qedexe esto.”

 

‘Ganî ewro dayîkî bieşkê şorê serê goristanan’

 

Netîce Çubuke zî reaksîyonê xo wina ramojna: “Eke qedexe bo, wa hemine rê qedexe bibo. Eke şima bêtêduştî bikerê, ma do qebul nêkerê. Do ewro dayîkê eskeran şorê serê goranê domananê xo la ma rê no heq nîno vînayene. Ma dayîk ê, vînayîşê mezelê domananê ma hizur dano ma. Eke ez nêşîra, do mi de vengîyêko vejîyo werte. Xora amancê dewlete zî no yo. Ganî ewro dayîkî bieşkê şorê serê mezelanê domananê xo. Ma rê roşan û şayî çin o. Domanê ma yenê qetilkerdene û ma înan ra dûr fînenê. Serdayîşê înan ma rê hizur dano. Wa roşanê qehremananê ma pîroz bo, tewr zêde ê roşan û şayîyan heq kenê. Înan seba aştîye û têduştî ganê xo da.”