Rengîn Azîzoglu

 

AMED - Endama Heyetê Îdarekarîya SESî Fatma Yildizhane, dîyar kerde ke prosesê normalbîyayîşê hema rew bi û va: "Verê ke kesê nimteyî ke nêweşîye hewênenê û hedîseyî bêrê dîyarkerdene, kewtê prosesê normalbîyayîşî. No qerar zî çi heyf ke weşîya komelî û merdimayî ra dûrî yo."

 

Endama Heyetê Îdarekara Sendîkaya Kedkarê Xizmetê Komelî û Weşîye (SES) Fatma Yildizhane derheqê prosesê normalbîyayîşî de şîrove kerde.

 

Fatma, da zanayene ke seba kedkaran prosesê pandemî seke prosesêko normal derbaz bîyo û wina va: "Prosesê normalbîyayîşî rew bi. Verê ke serê her kesî de test bêro kerdene û hedîseyî bêrê tespîtkerdene kewtî prosesê normalbîyayîşî. No zî weşîya komel û merdiman ra dûrî yo. Polîtîkayê ekonomîye yê sîstemî ke heta ewro bi ca anê, rayîrêko bîn nêverdeno. Bi polîtîkayê şerî dir ekonomîya welatî qedîya. No proses zêde nêeşkeno bêro dewam kerdene. Seba ekonomîye mecbûr mendî ke bikewê prosesê normalbîyayîşî. La do netîceyê ci giran bê."

 

'Akerdişê AVMyan merdim nêeşkeno qebul bikero'

 

Fatma, dîyar kerde ke sebebê rojevkerdene AVMyan oyo ke verê merdiman bi zanayîş bidê AVMyan û va: "AVMyî seke çîyêke seba merdiman xeylêk hewceyê ramojnenê. Prosesê  pandemîyî dewam keno û akerdişê cayê wina seba pawitişê sermayeyan o. Akerdişê AVMyan bi tu hewa merdim nêeşkeno qebul bikero."

 

'Ganî hewcedarîyê şarî bêrê peydakerdene'

 

Fatma, dîyar kerde ke komelî terkê qedere xo ameyê kerdene û va: "Heta ke weşîya şarî, verê her çî nêro, ma nêeşkenê vajê vîrus qedya yo. Ganî maskeyî bêrê xebitnayene, bêrê ferzkerdene. Ganî maskeyî nêrê rotene. Bê pere bidê şarî. Ganî hukmat fek berjewendîyanê xo ra vera bido. Ganî hewcedarîyê sereyîn ê şarî seke fatureyan zî hetê dewlete ra bêrê dayene."