Şehriban Abi 

 

QERS - Endama Meclîsê Cinîyan ê Konseyê Şaristanî Yelîz Çapure xebat û projeyê ke hetê Şaredarîya Qersî û Konseya Şaristanî ra ameyê amadekerdene qalî kerde û dîyar kerde ke seba ke cinî wareyê ramitişî de dûr nêmanê û bi herre dir bêrê têhet, îmza eştê xeylêk projeyanê ekolojîk.

 

Şaredarîya Qersî ya HDPyî û Konseya Şaristanê Qersî, şaristanî de xeylêk xebatanê ekolojîk kenê. Tewr peyîn hewteyê vîyarte de baxçeyê Firina Nanê Şarî ê Şaredarîya Herêma Sanayî Organîze de ca girewtêne, 120 darê fêkîyan ameyî ramitene. Endama Meclîsê Cinîyan ê Konseyê Şaristanî Yelîz Çopure derheqê xebatan de şîrove kerde.

 

'Ma seke Konseyê Cinîyan xoser xebityenê'

 

Yelîze arde ziwan ke şaredarî hetê ekolojî de xeylêk xebatan kena û va: "Ma projeyê baxçeyê aîdê cinîyan bi ca ard. Projeyê serayî ê îsot, balîcan, firingî û xiyar yenê ramitene estê. Ma seke Konseyê Cinîyan, xoser xebityenê. Tena hîn xebatan de şaredarî ra paştdayîş gênê û benê hemkar. Tewr peyîn ma 8ê Adare de bazarê keda cinîyan akerd. Cinîyan bazar de berardişê keda destê xo rotî û netîceyê baş ameyî girewtene. Dima ra seba vîrusî projeyê ma vindertî la ma reyna zî ma xebatê xo kenê."

 

'Do cinî wareyê ramitişî de aktîf bê'

 

Yelîze dîyar kede ke Qers de cinî wareyê ramitişî de qels manenê û va: "Cinî bi herre û  nebatan dir mîyan de ya. La wextê ramitişî yeno vatene, camêrdî yenê hişê merdimî. Ma wazenê nê hukmî bişiknê û cinîyan beşdarê  projeyê ramitişî bikerê. Ma serê erdî de bi ramitişê şitlan dest pêkerd. Ma sayan ramitî. Ma do toximanê hetê Konseyê Şaristanê Bursa ê Nîluferî ra ameyê eşrawitiş zî biramnê."