WAN - Nesrîn Demîra ke emro qij de mektebe ra ameye girewtene û dima ra ameye zewicnayene, qetî fek xeyelanê xo ra vera nêda. Nesrîne dikanê xo akerd û berardişê keda destê xo rot û verê nê de zî seba cinîyan wareyê îstîhdamî awan kerde.

 

Nesrîn Demîre emro qij de yena zewicnayene û dimayê zewacî vera ke xo keye de heps bikera, seba ekonomîye xo kewena mîyanê hewldayîşî. Taxa Xaçorî ya Îpekyolê Wanî de dikanêke akena û berardişê keda destan roşena.

 

'Zehmet bi la ez bi ser kewta'

 

Nesrîne arde ziwan ke 19 serrî de ameya zewicnayene û wina va: "Seke her cinî, xeyalê min ê wendişî estbi. Zewacnayîşê xo de mi demê zehmetî antî. Ez hetê ekonomî û manewî de xirab bîya. Dima ra mi dikanêke akerd. Zaf zehmet bi la ez serkewte bîya. Amancê mi o bi ke ez bi dikanê xo serê linganê xo de bimana û hewceyê kesî nêbî. Cinî eşkenê her het ra serê linganê xo de bimanê."

 

'Wa cinî hêzê xo bizanê'

 

Nesrîne da zanayene ke waşta ke dikanê xo pîl bikera û xeylêk embazê aye zî ci ra tesîr bîyê û va: "Embazê mi berardişê xo viraştêne, ardêne verê mi. Ma wina rot. Cinîyan pê deabara xo kerdêne. Na rewşe mi zaf kêfweş kerdêne. Seba cinîyan ekonomî zaf girîng a. Ganî pêro cinî têkoşîn bikerê û bêveng nêmanê. Wa cinî her wext hêzê xo bizanê."

 

'Ma do sere nêtewênê'

 

Nesrîne tewr peyîn qalîkerdişê xo de bale ante serê rolê cinsî yê komelî û va, heme cuye de barê cinîyan giran o û keda cinîyan nîna vînayene, heqê vatişî nêdanê cinîyan û va: "Wazenê cinîyan bi şîdet, tore û namûs î bêveng bikerê. Ewnîyayîşêko, 'do domanan bîyarê, karê keyeyî bikerê, bêveng bê' awan bikerê. cinî û camêrdî seyyewbînan ê. Pêwa pêro çî ma fek têkoşînê xo ra vera nêdanê û a do sereyê xo nêtewênê."