Fîlîz Zeyrek

 

EDENE - Kampanyaya Wayûbirayî ke HDPyî vera vîrusî bi amancê paştdayîşî da destpêkerdene, Edene de dewam kena. Endama Meclîsê Cinîyan ê HDPyî Aysel Kiliçe dîyar kerde ke paştdayîş, tena hetê ekonomî de ney, hetê psîkolojîk de zî xeylêk girîng o û vat, xo resnayê xeylêk keyeyan.

 

Bi vîrûsê koronayî dir bi hezaran kesî karê xo ra bî. Merkezê Pêroyî yê Partîya Demokratîkî ê Şaran (HDP) bi amancê paştdayîşê keyeyanê hewcedaran kampanyaya ‘Keyeyê Wayûbirayî’ dayî destpêkerdene. Pêro rêxistinê merkezî çarçeweya kampanya de xo resnenê welatîyan. Endama Meclîsê Cinîyan ê HDPyî ya Edenî Aysel Kiliçe dîyar kerde ke çarçewaya kampanya de xo resnayê xeylêk keyeyan û vengdayîşê beşdarbîyayîşê kerdî.

 

403 keyeyî ameyî tespîtkerdene

 

Aysele da zanayene ke xeylêk keyeyî seba vîrusî nêeşkenê debara xo bikerê û vat, tay bo zî wazenê paştdayîş bidê nê keyeyan û vat: “Nê prosesî de ma bi xesasîyetê, ‘destê ke dano wa destê bîn nêzano’ têgeyrayî. Ma bi metodêko xesas kampanya kerd. Ma keyeyê ke wazenê bi keyeyanê bînan dir destek bidê, înan kerdî mîyanê têkilî. Ma 403 keyeyê wayîrê hewceyî tespît kerdî. Ma seba 284 keyeyan hetkarîya xida û pere kerd. Seba 119 keyeyan zî hrma hetkarî nêşîya.”

 

‘Betalî û feqîrî xeylêk zêde yo’

 

Aysele dewamê qalîkerdişê xo de dîyar kerde ke rojanê îstîsnayî ra derbaz benê û vat: “Seba vîrusî, kargerî ameyî padayene. Qedexeyê tebervejîyayîşê kuçeyan esto. Xeylêk kesî betal mendî. Coka zî feqîrî û betalî xeylêk zêde bî. Keyeyê ke ma xo resna înan rastî de zî mexdûr ê. Nê feqîrî de yê ke tewr zêde tesîr benê cinî yê. Xeylêk keyeyê ke ma nêresayê înan estê. Ma hewl danê ke çi destê ma ra bêro ma do bikerê.”

 

‘Tena paştdayîşê ekonomîye nîyo’

 

Aysele tewr peyîn da zanayene ke tîya ra tepya zî xebatanê xo dewam bikerê û vat: “ Caardişê kampanya ‘Keyeyê wayûbirayî’ tena paştdayîşêko ekonomî ney ê manewîyo zî. Nê rojanê zehmet de bi qasê xida bi paştdayîş rê zî hewce estbi. Ma nê bi ca ard. Ma wazenê no her wext bibo.”