MERKEZÊ XEBERAN - Têkoşerê kurdan Leyla Qasime bi xoverdayîşê û têkoşînê xo mîyanê tarîxî de cayê xo girewt. Bi xoverdayîşê xo mîyanê kurdan de ameye nasneyene û bi helwestê xo zî rayîrê azadî akerd.

 

Cinîyê kurdî bi xoverdayîş, têkoşîn û rayberîya xo nameyê xo tarîxê şarê Kurdî de nuştiş. Her rîpelê tarîxî de şarê Kurdan de cinîyêka têkoşer esta. Yew înan ra zî cinîyan ra rayîrê azadîye weçîna Leyla Qasime ya.

 

Leyla Qasime seba şaîran bî çimeyêke, xeylêk keyeyî xoverdayîşê Leyla ra bi tesîr bî û nameyê domane xo kerdî Leyla. Bi têkoşîn û xoverdayîşê xo cinîyê kurdan rê bî nimûne û rayber. Leyla yewin cinîya Kurdan bî, Başûrê Kurdistanî de seba têkoşîn û fikrê xo ameye daliqnayene. Serê daliqnayîşê Leyla Qasime ra 46 serrî derbaz bi.

 

‘Bi meqaleyê xo hedef yena girewtene’

 

Ewro serrgêra 46. yê qetilkerdişê nê embazan o. Cinîya kurde Leyla Qasimeserra 1952î de dewa Bamîlî ya Xaneqînî de yena dinya. Leylaye keyeyê xo de cinîya tena bîye. Serewedartox û zerrî ra bîye. Pîyê Leyla citkarî kerdêne. Mektebo binameyê Wend wende û serkewte bîye. Leyla domanîya xo de xeylê aktîf bîye. Herçiqas ke keyeyê Leyla feqîr bibo zî pîyê Leyla waştêne ke Leyla biwana. Badê mektebo seretayî keyeyê Leyla 1958î de feqîrî ra koçê Bexda keno. Leyla ewja de mektebê xo domnaye û beşê Komelnasî yê Unîversîte qezenc kena. Wexto le Leyla 20 serrî bîye, Yewîya Xoverdayoxanê Kurdan şinasnena û meqaleyêk nusena. Meqaleyê xo de qala dişmenîya Sedam Hisênî yê hemverê kurdan kena û coka yena hedefgirewtene.

 

Vera pederşahî serre wedernena

 

Her çiqas ke Iraq de zextê îstixbaratê Baasî zêde bibo zî, serra 1972î de mîyanê bajarê Bexda de têgêrayîş û têkoşînê Yewîya Xoverdayoxanê Kurdistanî zêde beno. Nê serran de zafaneyê hêz û şoreşê kurdan binê rayîrberîya PDKyî de koyanê başûrê Kurdistanî û herêmanê azadan de kom bîbî. Seba ke Leyla Qasim vînena her kes vano; kurd tena eşkenî dew û koyan de sere wedarnî, cinî nêeşkena tewrê gureyê camêrdan û xebatê şoreşgerî biba, qerar dana ke hîna aktîf tewrê wendekaranê ciwanan biba û zebatanê kurdwerî bajarê Iraq û taybet zî Bexda de zêde bikera.

 

Tewrê 4 embazanê xo ameye tepiştene

 

24ê nîsana 1974î de Leyla Qasim tewrê 4 embazê xo yê bi nameyê; Cewad Hemewendî, Nerîman Fuad Mestî, Hesen Hemereşîd û Azad Silêman Mîranî netîceyê operasyonê teyaregeh ê hêzê rejîmê Baasî de Bexda de yenî tepiştene. Leyla Qasime îşkenceyê giranan vînena, la nêeşkenî tu cekuyêk fekê aye ra bivejnî.

 

Kurdistan de bî sembole xoverdayîşî

 

Leyla Qasim cinîyêka têkoşer û cesaret bîye. Wexto ke îstixbaratê Baasî îfadeyê Leyla Qasime gêno, Leyla Qasime înan rê wina vana: “Mi bikişêne, la bizanêne ke kiştişê mi do bi hezaran kurdan hewne ra şîyar bikero. Ez xeylê kêweş û sereberza ke ez do xo fedayê xelisnayîşê Kurdistanî bikera.”