Fîlîz Zeyrek

 

MERSÎN - Naîfe Çobana ke kêna û birayê aye zîndan de yê, reaksîyon vera qanûnê înfazî da û vat: “Faşîzmê AKP-MHPyî domananê ma zîndanan de terkê mergî kenê. Ganî ma vengê xo hîna xurt vejê. Eke hewce bo ma do her roje çalakîya roniştişî viraznê.”

 

Seba vîrusê korona tabloyê dinya her ke şino giran beno. Tirkîya de zî dimayê ke vîrusî rî da hîn tedbîrî ameyî girewtene û na çarçewa de AKP-MHPyî qanûnê înfazî vet. Qanûn de seba hezaran hepsîyanê edlîyan rayîrê tahlîye abi la çi heyf, hepsîyê sîyasî tede ca nêgirewtî. Dimayê nê keyeyan xeylêk reaksîyon ramojna. Naîfe Çobana ke di kêna û birayê aye zîndan de yê reaksîyon ramojna û vat, ê bi endîşeyêko pîl proses taqîb kenê.

 

‘Ma bi endîşeyîn ê’

 

Naîfe dîyar kerde ke kênaya ci Şehrîbane zîndanê Şakranî yê Îzmîrî, kênaya bîne zî zîndanê Gebze ê Kocaelî de manena û vat: “Verê hîrê kêna û lajêko mi zîndan de bî. Di heb ameyî veradayene. Ez seba domananê xo û heme hepsîyan bi endîşe ya. Proses bi problem o. Dayîkî dejêko pîl ancenê. Ma seba domananê xo bi endîşe yê. Faşîzmê AKP-MHPyî tena kiştoxê cinîyan, tacîzkar û çeteyan vera dayî. Êyê ke fikr û fehmê xo pawitî zî zîndanan de yenê tepiştene.”

 

‘Ma vîrus goşdarî nêkerê û çalakîya roniştişî bikerê’

 

Naîfe dewamê qiseykerdişê xo de da zanayene ke ganî çareserîyêk bêro vînayene û vat: “ Do her çî ra AKP-MHP berpirsîyar bo. Eke hewce bo ma do çalakîya roniştişî bikerî. Şarê Kurdî bê pawitene manenê. Zulm kenê serê domananê ma de. La ma do qetî serkewte bibê. dimînin. Goreyê 40 serrî verê têkoşînê ma ewro hîna xurt o. Ganî ma semedê domananê xo zêdeyêr vengê xo berz bikerê. Eke hewce bikero, ma do vîrus goşdarî nêkerê û çalakîya roniştişî bikerê.”

 

Naîfe dîyar kerde ke domananê xo dir telefon de qisey kena û vat: “Tedayê serê domananê ma zêde benê. Hacetê pakitî û dezenfektanan nêdanê. Tu tedbîr nêameyê girewtene. Verê înan de hepsîyê nêweş, kal û pîr û domanî estê. Nêweşî zî nînê dermankerdene. Dermanê înan nêdanê. Eynî wextî de pereyêko ma serê PTTyî de erşawenê zî îdare nêdano hepsîyan. Waştişê ma oyo ke baro û parlamenterî serê rewşa hepsîyan de vinderê.”