ŞIRNEX - Dayîka Taybeta 57 serrî ke ameye qetilkerdene, 11 domanê ci 4 serrî yo Roja Dayîkan bê dayîka xo pêşwazî kenê û kênaya ci Halîme Akine arde ziwan ke ê bi dejêko pîl kewenê na roje. Halîme, Xalîse Aksoya ke esteyê lajê ci Egît Îpekî bi rayîrê kargoyê PTTî ci rê ameyî erşawitiş zî arde vîr û vat: “Gama ke mi a xebere derheqê dayîke Xalîse de dî, dayîka mo ameye vîra mi û dejêko pîl kewt zerrîya mi.”

 

Ewro 10ê Gulane Roja Dayîkan o. La herême de bi seyan dayîk estê ke bê domananê xo roje pêşwazî kenê û xeylêk domanî zî bê dayîke xo kewenê na roje. Nê domanê ke bê dayîka xo na roje pêşwazî kenê zî domanê Taybet Înanê ke her 11 zî bê dayîka xo na roje Sîlopîyê Şirnexî de pêşwazî kenê.

 

Taybet Înane cinîyêka 57 serrî ke wextê qedexeyê tebervejîyayîşê kuçeyan ê 19ê Çeleyî 2015 de qezaya Silopîyê Şirnexî de hetê hêzanê dewlete ra ameye qetilkerdene. Destûr nêame dayane ke cenazeya Dayîka Taybete erd ra wedarnê. Cenazeya Dayîka Taybete 7 rojan kuçe de verê çimanê domananê aye de ameye vindarnayene. Kesê ke waştêne şorê cenaze bigîrê, gule vera dayîne înan û înan ra hîn kesî birîndar bibî. Serê kiştişê Dayîka Taybete ra 4 serrî derbaz bi û keyeyê aye de hema şînê ci dewam keno. Kênaya dayîka Taybete, Halîme Akine ke roja dayîkan bi dejêko pîl pêşwazî kena, heto bîn ra melhefe daya sereyê xo û waştişê azadîye kena.

 

Roja dayîkan goristan de pêşwazî kenê

 

Halîme, arde ziean ke serê kiştişê dayîka ci de 4 serrî derbaz bî û aye 4 serrî yo ke bi dejêko pîl roja dayîkan pêşwazî kenê. Halîme, ana ziwan ke seba înan manaya na roje nêmenda û vana ke her roja dayîkan yena ê şonê serê gora dayîka xo.

 

‘Roja dayîkan seba mi nîna tu mana’

 

Halîme, arde ziwan ke qetilkerdişê dayîka ci bi dejêko nîno ziwan o û Roja Dayîkan de bê dayîka xo na roje pêşwazî kenê û vat: “Cenazeya dayîka mi 7 rojan kuçe de ameye vindarnayene. Ma nêeşkayîne şorê crnazeya ci bigîrê. Wexto ke ma şîne, gule eştêne ma. Roja Dayîkan seba mi nîna tu mana. Seba ke ewro dayîka ma verê ma de nîya. Labelê ma reyna şonê goristan. Ma roja dayîkan goristan de pîroz kenê.”

 

‘Werrekna dayîka mi ewro verê mi de bibayîne’

 

Halîme, wexto ke qalê Roja Dayîkan kena hesrî çimanê ci ra yenê warî û vat: “Werrekna dayîka mi ewro verê ma de bibayîne. Ma a roje pîya pêşwazî bikerdêne. Aye seba mi tena dayîkêka nêbî, sewbîna seba mi hemraye mi bî zî. Wexto ke dayîka mi civatêke de qalî kerdêne, pêrûne aye bi rizdarî goşdarî kerdêne. Dayîka xeylêk sohbetê weşan kerdêne. Ewro ez çîyêke dayîka xo ra musaya bj ca ana. Ez o qetî ne dayîka xo û ne zî xoverdayîşê aye xo vîr ra bikerê. Wexto ke roşan û rojê taybetan de heme kesî dayîkanê xo zîyaret kenê, ma zî nê rojan bê dayîke pêşwazî kenê. Kesê ke nê dejî bi ma da ciwîyayîş, omid kena eynî dejî înan bi ancê. Dejê ma 4 serrî yo qet kêm nêbîyo.”

 

‘4 serî yo bê dayîke xo na roje pêşwazî kenê’

 

Halîme vat, Roja Dayîkan seba ci dejêko nîno ziwanî yo û wina vat: “Xeylêk domanî seke ma bê dayîka xo Roja Dayîkan pêşwazî kenê. Xeylêk dayîkî zî bê domananê xo na roje pêşwazî kenê. Bi her di het ra zî seba ma ewro rojêke bi dej o. Verê ke dayîka mi bêro qetilkerdene ma Roja Dayîkan de şîne verê ci û ma roja ci pîroz kerdêne. Labelê 4 serrî yo bê dayîke xo ma na roje pêşwazî kenê. Roja heme dayîkanê zerrîşiknayeyan pîroz kena. Ma wezenê no dej biqedîyo.”

 

‘Dejêko pîl kewt zerrîya mi’

 

Halîme, Xalîse Aksoya ke esteyê lajê ci Egît Îpekî bi rayîrê kargoyê PTTî ci rê ame erşawetêne zî arde vîr û vat: “Wexto ke mi na xebere û fotograf dî, dayîka mi ameye vîra mi. Ewro zerrîya a dayîke de zî dejêko pîl esto. Bi kargoyî dir erşawitişê cenaze qetî nîno qebulkerdene. Gama ke mi dayîka Xalîse dî, ez xeylêk xemgîn bîya. Dima ra ez verê televîzyonî de nişta ro bermaya. Ma do waştişê xo yê azadî û aştîye dewam bikerê. Ma do qetî fek waştişê xo ra vera nêdê.”