ENQERE - Endamê Grup Yorumî Îbrahîm Gokçek memleketê ci Kayserî de ame definkerdene.  Polîsan goristan girewt binê ablûqa û ca-ca hêrişî ameyî kerdene. Cinîya Îbrahîmî, Sultan Gokçeka ke zîndan de ya tewrê merasîmî bîye û ey ra xatir waşte.

 

Endamê Grup Yorumî Îbrahîm Gokçek o ke roja 323. ya rojeyê mergî mabên da çalakîya xo û di rojî dima ra cuya xo vînî kerde ewro memleketê ci Kayserî de binê ablûqa û hêrişê polîsan ver bi raywanîya xo ya bêpeynîye ame raştkerdene.

 

Cenazaya Îbrahîmî serê sibayî hetê merdimanê ci ra morgê Goristanê Reşadîye ra ameye girewtene û ameye berdene Goristanê Halebî. Goristan bi wesayîtanê zirxinan û polîsanê têgêrayîşê taybetî gerîya binê ablûqa û destûr nêdîya ke çew/e nizdîye goristanî bibo. Cinîya Îbrahîmî, Sultan Gokçeka ke zîndan de ya binê kontrolê leşkeran de tewrê merasîmî bîye.

 

Badê definî destûr nêdîya ke embazê Îbrahîmî qisey bikerî û polîsan endama Grup Yorumî Bahar Kurte rê hêriş kerd û derb kerd. 

 

Avûkata Îbrahîmî, Ayşegul Çagagataye da zanayene ke Sultane berdê keyeyê ci la nêzanê do key berê zîndan.