WAN - Dayîka hepsîyê bi nameyê Botan Tîmurî, Aslihan Tîmure dîyar kerde ke 2 mengî verê bi rayîrê PTTyî ra pere lajê xo rê eşrawita, la hema pere nêkewto hesabê ci û vat: “Pereyo ke ma eşrawenê zî nêkenê hesabê domananê ma. Gelo do domanê ma xo senîn bipawê.”

 

Seba vîrusê koronayî rîsk zîndanan de pîl beno. Goreyê xeberêke zîndanan ra yenê, xeylêk zîndanan de tedbîr nêameyê girewtene û îhlalkerdişê heqan zêde bîyo. Hepsîyê ke bi telefon keyeyanê xo geyrenê zî dîyar kenê ke asayîşê ganê înan çin o.

 

‘Ma seba vîrusî betal mendî ma nêeşkenê pere bierşawî’

 

Botan Tîmurî zîndanê Asayîşê Berzî ê Tîpê T yê Wanî de 5 serrî yo hepsî yo û geyrayîşê telefonê yê bi keyeyî dir dîyar kerd ke pereyê ke keyeyê înan erşawenê, hesabê înan de çin ê û coka nêeşkenê hacetê pakîtî bigîrê. Dayîka ey Aslihan Tîmure wina vat: “Lajê mi vat, şertê înan baş nîyê. Seba ekonomîye ma xora nêeşkenê pere bierşawê û o zî nêeşkeno her çî bigîro. Seba korona ma betal mendî. Karêko çin o ke domanî bixebityê. Kargehî ameyî padayene û ma tewr zêde feqîr bî.”

 

‘Ganî ma seba domananê xo bêveng nêmanê’

 

Aslihane ke 6 domanê ci estê û 3 domanê aye ceza înan rê ameya birnayene, wina vat: “Domanêk mi seba ceza vejîya teberê welatî. Lajê min o tepişte di serrî yo mi ey nêdîyo. Dikano ke ma pê debara xo kerdêne, ame padayene, hacetê ma ameyî diznayîş. Veng dana pêro dayîkan. Wa bêveng nêmanê. Seba domananê xo ma çîyêk bikerê. Ganî ma seba domananê xo têkoşîn bikerê û vengê xo berz bikerê.”

 

‘Eke hewce bikero ma do şorê verê wezaretê dade’

 

Aslihane da zanayene ke 2 mengî verê seba Botanî pere eşrawita la hema nêkewto hesabê ci û wina vat: “Ma PTTyî ra pers kenê vanê do şoro. Mi reyna pere deyn kerd û ci rê eşrawit. La vat no pere nêameyo dayene. Pereyî verê zî neql nêbîyê. Domananê ma gênê û kenê zîndanan. Qanûn vetî heme dizd, kiştox û tecawizkaran feyde ci ra dî. Ma nê qebul nêkenê. Eke hewce bikero ma do şorê verê Wezaretê Dade çalakî bidê destpêkerdene.”