WAN - Avûkata OHDyî Ekîn Yetere dîyar kerde ke prosesê vîrusî de îhlalkerdişê heqan zêde bîyo û koxuş her wext nînê dezefektekerdene, maske û dezenfektan zaf vay bîyê û hepsîyê nêweşî nînê dermankerdene.

 

Bi hezaran hepsîyê sîyasî, teberê qanûnê înfazî de ameyî verdayene û yeno zanayene ke heta nika 120 kesî zîndanan de bi vîrusê kewtê. Eynî wextî de tedbîrê baş zî nînê girewtene û zanayîşê îhlalkerdene zî yenê. Zîndanê Wan û Panosî de zî her roje îhlalkerdişê heqan yeno rojeve.

 

Endama Komeleya Huqûqnasê seba Azadîye (OHD) avûkat Ekîn Yetere, derheqê tespîtê zîndanê Tîpê T, F, M û Asayîşê Berzî ê Wanî û zîndanê Tîpê L yê Panosî de qiseykerde. Ekîne dîyar kerde ke raporê derheqê zîndanan de amadekerdişê bi masaya krîzî yê Covîd-19î yê Wanî pare kerde.

 

‘Cigêrayîşê cil û belgan dewam keno’

 

Ekîne da zanayene ke zîndanan de tay tedbîr ameyî girewtene la qels ê û vat: “Dekewtişê zîndanan de xebatkarê zîndanan û leşkeran, lepik û maskeyê înan estê. Lepik û maske danê avûkatan û germbîyayîşê bedenî pawenê. Wextê pêvînayîşan maske û lepik danê hepsîyan zî. La qiseykerdişê telefonan de hepsî dîyar kenê ke lepik û maske nêdanê înan û cigêrayîşê cil û belgan kenê.”

 

‘Maskeyan bi 3 TL, dezenfektan bi 55 TL yeno rotene’

 

Ekîne dewam de wina qalî kerde: “Maske, dezenfektan û lepikan nêdanê hepsîyan. Tena hîn deterjan danê. Bi taybet hacetê zîndanan yenê rotene û xeylêk vayê. Zîndanê Tîpê T yê Wanî de maskeyî bi 3 TL, Tîpê L yê Panosî de bi 1 TL yenê rotene. Dezenfektanî zî bi 55 TL yenê rotene. Eynî wextî de xebitnayîşê awe, ceyran û xidayî zî bi pereyê. Tîpê L yê Panosî de problemê awe esto. Hepsî bi awa laximî, hewcedarîyê xo kenê. Eynî wextî de hacetê ke teber ra yenê; kitab, rojname, kovarî nînê dayene û radyo yenê komkerdene. Tena televîzyonan de hîn kanalî estê. Uca ra zanayîşan gênê. Hepsî şertê tecrîdî de yenê girewtene.”

 

‘Semîran Erbaga nîna dermankerdene’

 

Ekîne da zanayene ke hepsîyê nêweşî zî nînê dermankerdene û wina vat: “Zîndanê Tîpê Tyî de muwekîla mi Semîran Erbaga 27 serrî ya û nêweş a tansîyonê berzî ya. Dermankerdişê ci yeno astengkerdene. Coka çend rey seba tansîyone rewşa aye giran bi. Nêberdî nêweşxane.”

 

‘Ganî tahlîye bêro kerdene’

 

Ekîne tewr peyîn qalîkerdişê xo de arde ziwan ke hûmara hepsîyan xeylêk zêde ya û îmkanê pakîtî, dermankerdişî zî çin o û vat: “No zî heqê ciwîyayîşî keno rîsk. Ganî heme zîndanan de tedbîr bêrê zêdekerdene. Ganî hepsî bêrê tahlîyakerdene. Ma seke OHDyî taqîbkerdoxê ci bê.