AMED - Îdarekara TUAY-DERî Sonbahar Orake îhlalkerdişê heqan ê zîndanan qalî kerde û dîyar kerde ke ganî hepsîyê sîyasî serbest bêrê veradayene û vat nê prosesî de nêzdîbîyayîşê hemverê hepsîyê sîyasîyan bi hawayêko eşkera veto werte.

 

Nê rojan ke heme dinya vera vîrusê korona têkoşîn kena, zîndanî zî nuqtayêka krîtîk de yê. Bi seyan hepsî zîndanan de bêpawitiş bi hewldayîşê xo vera vîrusî têkoşîn kenê. Dimayê 3in paketa hukmî ameye bicaardene, tehlîyekerdişê hepsîyê edlîyan dest pêkerd û çi heyf hepsîyê sîyasî pakete de ca nêgirewtî. Îdarekara Komeleya Keyeyê Hepsîyan (TUAY-DER) Sonbahar Oke îhlalkerdişê heqan qalî kerde.

 

‘Kesê ke komelî de suc kerdibî ameyî veradayene’

 

Sonbahare vat, paketa hukmî yê verê amebî rojeve, prosesê vîrusê de ameye vetene û proseso ke sazgehê komelê sivîlî tewrê ci nêbenê de ameya tesdîqkerdene û vat: “Hukmat prosesêko sînorkerde û qedexeyî de vurnayîşê qanûnî kerd. Xeylêk welatanê Ewropa û dinya de bêtêduştî çinbî û heme hepsî ameyî tehlîyekerdene. A ke Tirkîya bikerdêne zî serbestveradayîşê heme hepsîyan bi. Labelê kesê ke vera merdimayî suc kerdî, hêrişê zayendî kerdî û çeteyî serbest ameyî veradayene.”

 

‘No yeno manaya mergî’

 

Sonbahare arde ziwan ke proses cidî yo û eke vîrus zîndanan de vila bibo do rayîr verê mergî abikero û vat: “Caardişê kêfî babeta vatişî yê. Nê prosesî ramojna ke senîn nêzdîyê hepsîyê sîyasîyan benê. Huqûq çin o, yanî huqûqê dişminî zî çin o. Yê ke yeno kerdene no yo ke hepsîyê sîyasî bi hawayêko eşkera terkê mergî kerdê. Goreyê zanayîşo ke ma keye û hepsîyan ra gênê, îhlalkerdişê heqan ê cidî yenê ciwîyene.”

 

‘Ganî serbest bêrê veradayene’

 

Sonbahare vat semedê tedayê raya pêroyî, wezaretê dade mecbur mend ke vajo 3 hepsî vîrusî ra merdê û 120 hepsî testê înan pozîtîf vejîyayo û vat: “Nê hepsî nêweşxane de yenê weşkerdene. Na rewşe hetê hepsîyan ra vejîya meydan. Zîndanê Riha, Dîlok, Qeyserî, Bunyan û Tarsûsî de nîşaneyê vîrusî zêde yo. Ganî hepsîyê nêweş serbest bêrê veradayene. Eynî wextî de zîndanî de hetê ekonomî ra zî probleman ciwîyenê. Ganî hacetê pakîtî, lepik û maske bê pere bêrê temînkerdene labelê kantînan de bi pere yenê rotene.”