MÊRDÎN - Hepsîyê Zîndanê Tîpê T yê Osmanîye keyeyê xo geyrayî û dîyar kerdî ke werd û hacetê pakîtî kantînan ra wazenê la nênê dayene.

 

Semedê vîrusê koronayî, qanûnê înfazî ke ame amadekerdene, hepsîyê sîyasî ci de ca nêgirewtî û reaksîyonê keyeyan vera nê dewam keno. Zîndanan ra zî xeberê ke hacetê pakitî û xida nênê dayene yenê. Eynî wextî de hepsî dîyar kenê ke vera vîrusî tu tedbîr nênê girewtene. Zîndanê Tîpê T yê Osmanîye de Mehmet Faruk Engîn û Abdulkadîr Baybarsî keyeyê xo geyrayî û dîyar kerdî ke pereyê seba înan ameyo eşrawitiş di mengî yo nêgirewtê û çîyê ke kantîn ra zî wazenê nênê dayene.

 

‘Gardîyanî bê maske yenê koxuşan’

 

Hepsî Mehmet Faruk Engînî, da zanayene ke gardîyanî yenê koxuşan maskeyan vejenê û kuxenê û vat, beno vîrus bêro zîndanan. Mehmet Farukî zî keyeyê xo rê neql kerd ke rewşa înan roj bi roje xirab bena û vat, pereyê ke keyeyê înan rê eşrawitê zî di mengî yo hetê îdarekarî ra nêno dayene.

 

‘Gardîyanî seke makînayê îşkence xebityenê’

 

Resmîye Baybarse zî vat ke lajê ci Abdulkadîr Baybarsî înan geyrayo û wina vat: “Lajê mi seba ke cezaya ci ameya tesdîqkerdene, hucreyê yew kesî de yeno girewtene. Di serrî yo bi tena sereyê xo hucre de yeno tepiştene. Kantîn de ne werdêko ne zî hacetêk pakîtî yeno dayene. Verê eştêne koxuşan ser de û dayne hepsîyan ro. Her tewir îşkence kerdêne. Ganê ma tîya dejeno. Çîyê ke nêardî sereyê lajê mi nêmend. Wa ganî peynîya îşkenceyan bîyarê. Gardîyanê uca seke makîneyê îşkence xebityenê.”