WAN - Hafsat Abîye dîyar kerde ke lajê ci zîndanê Panosî de nêweşê gurçikan o û vat, ganî semedê pêro hepsîyanê nêweşan tedbîr bêrê girewtene. Hafsate arde ziwan ke pêvînayîşê telefonî qîm nêkeno û wayîrvejîyayîşêko baş uca de çin o.

 

Paketa înfazî ya bi rayanê AKP-MHPyî meclîsî ra ame derbazkerdene, hepsîyê sîyasî ci de ca nêgirewtî û vera nê reaksîyonê keyeyan dewam keno. Goreyê îzahatê wezaretê dade hûmara kesê ke zîndanan de bi vîrus kewtê bîya 120. Vera nê tedbîrêko baş nêame girewtene û hacetê pakitî û xida nînê dayene û îhlalkerdişê heqan dewam kenê.

 

‘Nêweşê gurçikan o’

 

Hepsîyê bi nameyê Halît Abîyo ke zîndanê Tîpê L yê Panosî yê Agirş de tepişte yo û nêweşê gurçikan o. Dayîka ci Hafsat Abîye vera çîyê ke yenê ciwîyene reaksîyon ramojna û vat: “Zîndanan de şertanê nêbaşan de manenê. Maqarna û girar danê. Baş nêewnîyenê înan ra. Ez keyeyê xo de nêeşkena nan biwerî. Lajê mi nêweşê gurçikan o. Vîrus kerdî sebeb û heqê qiseykerdişê telefonî yê hewteyî ra di rey fînayî reyke. Xora heqê qiseykerdişî zî kilm o. Ma hemine rê deqeyêke zî nêkeweno. Lajê mi telefon de va ke, werdo baş nêdanê. Awe lêşina û nêeşkenê bi avûkatan dir pêvînayîş bikerê.”

 

‘Qanûn ra kiştoxê cinîyan feyde gênê’

 

Hafsate dewamê qiseykerdişê de dîyar kerde sucdarê edlî qanûnê efûyî ra feyde girewtê û kesê ke vera cinî û domanan suc kerdê ameyê veradayîş û wina va: “Hepsîyê sîyasî teberê nê de ameyî verdayene. No qetî nêno qebûlkerdene. Tu sucê domananê ma çin o. Dewlete nêwazena înan vera bido. Êyê ke vera dayî reyna suc kenê.”

 

‘Gardîyanî bi hawayêko kêfî têgeyrenê’

 

Cinîya Halît Belgîn Abîyî zî dîyar kerde ke şert û mercê ekonomî û zimistanî, dûrbîyayîş ra her wext nêeşkenê şorê pêvînayîş û wina vat: “Pêvînayîş zî bi hawayêko kêfî yenê astengkerdene. Gardîyanî mudaxale kenê. Vîrusî ra xora ma nêeşkenê şorê. Ma rewşa înan nêzanê. Awe lêşine danê. Werdêk baş nêdanê. Gerek hewte ra di rey bigeyrayîne la reyke geyrenê. Vatî do kolonya û maske bidê la ê zî nînê dayene.”

 

‘Gerek heme efû bibayîne’

 

Belgîne qiseykerdişê xo wina qedêna: “ Nêvatî no efû yo, vatî no sererastkerdişê. La no efûyêk taybet bi. Hepsîyê edlî ameyî veradayene la sîyasî zere de yê. Kiştoxê cinî û domanan, êyê ke tiryakî roşenê serbest ameyî veradayene. Nê kesî nika teber de geyrenê.”