Melîke Aydin

 

ÎZMÎR - Nêweşa rîşa merdimwere Umut Şenera ke zîndan ra tehlîye bîye, nika zî vera binpaykerdişê heqan yê ke zîndanan de virazîyenî de têkoşîn dana. Umute daye zanayene ke şertê zîndanan goreyê nêweşan nîyo û vat ke vera zîndanan de hîssgerîye wezîfeyê merdimîye ra yo.

 

Hepsîya nêweşa rîşa merdimwere Umut Şenera ke nizdîyê 3 serrî yo ke tepişte ya, 15ê nîsane de Zîndanê Cinîyan yê Şakranî ra tehlîye bîye. Umute sereştişê Merkezê Kulturê Îdîlî yê Stenbol de meyman bîye û coka ameye tepiştene. Umute dima ra surgunê Zîndanê Şakranî ameye kerdene. Umute derheqê babeta şertê zîndanan de qisey kerde û bale ante binpaykerdişê heqan ser o.

 

Umute şikê rîşa merdimwere ra sewqê urolojî yena kerdene û waştişê aye ya 5 û 15ê kanûna serra verêne ya sewqkedişê Stenbolî zî nîna qebulkerdene. Umute vat ke 19ê kanûne de vejîyaya revîr û her çiqas ke rewşa aye xirab biba zî aye erşawitî kampusê Şakranî.

 

Umute nêweşa rîşa merdimwere badê ke ameye tehlîyekerdene qisey kerde û wina va: “Ez 26ê kanûne de reyna şîya nêweşxane. Ultrason ame antene. Doktor vat ke rîskê rîşa merdimwere zêde yo û mi sewqê nêweşxane kerd. Proseso ke dima ra amel ez aver şî. Raporê patolojîyî badê amelîyatê mi yê 22ê çileyî eşkera kerdî.”

 

‘Xebatê dezenfektekerdişî ameyêne taloqkerdene’

 

Umute dewamê qiseykerdişê xo de bale ante xebatanê dezenfektekerdişî ser o û domnayene: “Xebatê dezenfektekerdişî bi serûber nêameyêne kerdene. Xora pêvînayîş nînê kerdene. Pêvînayîşê avûkatan zî bi mehneya prosesî ame astengkerdene. Binpaykerdişê heqan merheleya tewr berzî de virazîyeno û hetê tecrîdî zî giran keno. Nêweşîye merheleya 3. de vilayê organanê mi bîye. Doktoran vat ke ganî ti baş biewna xo. Ez embazanê xo rê spas kena. Ma zîndan de pê îmkananê tayan îdare kerd. Kantîn de seba werdê nêweşan çîyêk çin o. Stok de çîyêk nêmen. Hetê tedawîbîyayîşî de şertê ewja baş nîyî. Tu çîyêk çin o. Merdim zîndanan de nêweş keweno. Hepsîyê nêweş nînê dermankerdene. Hepsîyanê nêweşan ser de kelemçe yeno ferzkerdene.”

 

‘Ganî merdim vera zîndanan de hîssin bibo’

 

Umute qiseykerdişê xo yê peyênan de înan va: “Ganî her kes wayîrê zîndanan bivejî yo. Nê kesî seba heqê merdimîye zîndanan de yî. Ganî merdim vera zîndanan de hîssin bibo. No wezîfeyê merdimîye yo. Ganî merdim wayîrê nêweşan bivejîyo. Wayîrvejîyayîşê zîndanan wezîfeyê merdimîye yo. Tedawîya mi baş nêame kerdene û nika têkoşîn dana. Ez kemoterapî vînena û do heta aşma tebaxe dewam bikero.”