AMED - Hemserekanê HDPyijan qezaya Amedî de dayê zanayene ke hêrişê serê Mexmûrî nînê qebûlkerdene û vatî: "Ganî heme partî û sazgehê Kurdistanî, fek berjewendîyê qij vera bidê, seba çareserîyan problemanê şarê xo, yewîya xo viraznê.”

 

Arteşa Tirkî 15ê Nîsane de hemverê Wargehê Multecîyan ê Şehîd Rûstem Cûdî (Mexmûr) hêrişêk ca ardî û netîce de hêrişî de 3 cinîyan, cuya xo vindî kerd. Verê hêrişan zî 10 mengî yo hemverê Maxmûrî de amborgoyêk esto. Mexmûrijî hem vera ambargoyî, hem zî vera hêrişan û eynî wextî de hem zî vera vîrûsê koronayî de mîyanê têkoşînê ciwîyayîşî de yê.

 

Vera hêriş û amborgoyî de xeylêk reaksîyon ameyî ramojnayene û çalakî ameyî viraştene. La sazgeh, rêxistin û partîyanê kurdistanî eşkerayîye xo de vera hêrişan her wext vengdayîşê awankerdişê yewîye kenê. Derheqê babetan de hemsereka Partîya Demokratîke ya Şaran (HDP) ya qezaya Sûrî Hatun Yildize, hemsereka HDPyî ya qezaya Yenîşehîrî Remzîye Sizici, hemsereka HDPyî ya qezaya Peyasî Besîle Bîlene ajansê ma rê qisey kerde.

 

‘Îxanet qetî nîno xovîrrakerdene’

 

Hatune dîyar kerde ke hêrişê dewleta tirkî tena seba tevgerê kurdan o, eynî wextî de vera destkewtişê kurdan o û wina va: “Ewro heme hêzê serdestî ke serê erdê Kurdistanî de yê, ma hedef gênê û wazenê ma qels bikerê. Bi no hewa deskewtişê ma xo rê îmkanê hêrişî vînenê. Coka vernê de verê xo danê vaşurê Kurdistanî û uca de bi plan û kayan hêrema Kurdistanî de wazenê bikerê parçeyêko plananê xo. PDK ke tewrê nê planan beno, şarê xo rê ixanetan keno. Hêrişê serê Mexmûrî îxanetêko pîl o, ganî no îxanetê PDKyî nêro xo vîr ra kerdene. Semedo ke vernîya hêrişê bînan bêro girewtene, lazim o ke pêro partî û sazgehê hêrema Kurdistanî nê planan bivînê û xo nê planan ra dûr verdê. Nê prosesî de ganî ma neteweyê demokratîk ca bîyarê û lezabez yewîya xo bi ca bîyarê.”

 

‘Seba çareserîyê probleman yewî hewce ya’

 

Remzîye, tifaqê AKP-MHPyî hemverê kurdan ercna û wina vat: “Îqtîdar, vîrusê koronayî seke firsendêko vîna, qeyûm tayînê şaredarîyanê partîya ma kerd. Ma dî ke wexto ke babete bena kurd, hukmat goş nêdano nêweşî, yan zî rewşa îstîsna. Eynî wextî de hêrişê serê Mexmûrî zî vindertişê xo reyke bîn zî eşkera kerdî. Hêrişê serê Mexmûrî rewşêka şermezarkerdene ya. Ganî şarê kurdistanî nê hêrişan qebûl nêkenê. Dej û problemê her çar parçeyê Kurdistanî seke yewbînan ê. Nê problemî tena bi rayîrê yewîye çareser benê.

 

‘Seba serkewtişî bibê yew veng’ 

 

Besîle, destpêkê qalîkerdene xo de bale ante serê her çar parçeyê Kurdistanî û wina vana: “Her çar parçeyê Kurdistanî de ziwan û kulturê kurdan ameyo qedexekerdene û qetlîeman dir rîbirî mendî. Hêzê sîyasî yê kurdan, temamê dinya û Rojhelatê Mîyanên de zêde yê, labelê nêeşkenê yewîya xo awan bikerê û her ke şono hêriş, teda û zulmê serê Kurdan zî zêdeyêr beno. Tewr peyîn zî hemverê Mexmûrî de hêrişêk ame kerdene û ambargoyê ke hetê PDKyî ra ameyê ronayene rewşe hîna giran kena.”