Hîkmet Tunç

 

WAN - Parlamentera HDPyî ya Wanî Muazzez Orhane hêrişê sîstematîk yê vera goristanan ser o şîrove kerde û vat: "Hêrişê vera goristanan, dewamê polîtîkayê bêwijdanî yê vera Kurdan o. No zî ramojneno ke semedê Şarê Kurdî heqê ciwîyayîşî nêno naskerdene."

 

Şaristanê herêmî de vera goranê HPGyijan her wext hetê leşkeran ra yenê texrîbkerdene. Reaksîyonê vera nê caardişan her ke şono girs benê. Parlamentera Partîya Demokratîke ya Şaran (HDP) ê Wanî Muazzez Orhane bale ante serê babete.

 

Muazzeze da zanayene, tevgerê ke merdiman ganeyan ra cîya keno oyo ke merdanê xo bi merasîmanê cîya defin kenê û wina vat: "Komeleyan de goristan û merdeyî manewîyat ê. Seranserê tarîxî de însanî, merdanê xo sey erc vînenê. Nê dir rewşa merdimayî û tarîxî, goreyê qerar û îçtîhatê huqûqê unîversale û Dadgeha Heqê Merdiman ê Ewropa, hêrişê vera goristanan bêrêzdarî û îhlalkerdişê heqan o."

 

'Goristanî yenê texrîbkerdene'

 

Muazzeze da zanayene ke heqê her bawerî û şaran de esto ke merdanê xo goreyê xo û cayê ke wazenê defin bikerê û vat: "No qanûnan de nênuseno. No çîyêk merdimayî yo. Heqêko xozayî yo û nêno munaqeşekerdene. Çi heyf, no proseso ke pêro dinya vera vîrusî têkoşîn kena de, Mûş, Wan, Amed, Çewlîk û Mêrdînî de vera goristanan de hêriş yeno kerdene."

 

'Menga Remeanî de zî dewam kerd'

 

Muazzeze arde ziwan ke hîn cayan de keyeyî ameyê tehdîdkerdene û vat: "Verê çimanê keyeyan de gorî ameyî perçekerdene û heqaret ameyî kerdene. Seba ke serê goran de tîpê Kurdî yê seke W,X,Q ameyê xebitnayene nê kerdî. Tu wijdan nê qebul nêkeno. No hêrişo lêşin, menga bimbareke ê Remezanî de zî dewam kerdo. No hêriş ramojnayo ke; wexto ke babete Kurdî bê, nêzdîbîyayîşêko merdimayî çin o. Çi heyf, prosesêko wina de zî dest polîtîkayê înkar û îmhakerdişê vera Kurdan de vera nêdanê. Her het ra hêrişê vera Kurdan dewam kenê."

 

'Hêrişê hemberê goristanan dewamê konseptê şerî yo'

 

Muazzeze wina dewam kerde: "Rojawan de zî hêrişî dewam kenê. Hewl danê ke demografîyê şaristananê Kurdan bivurnê. Hetêk ra hêrişê vera Mexmûrî, hetêko bîn zî tayînkerdişê qeyûman û hêrişê vera goristanan. No dewamê konseptê şerî yo. La bi tu hawa nêeşkenê bi polîtîkayê înkar û îmhayî yê seserre şarê Kurdî çin bikerê. Bi hêrişanê vera goristanan, şima nêeşkenê bîyayîşê Kurdan çin bikerê. Ganî problemê  Kurdan bi rayîranê demokratîkî bêrê çareserkerdene."

 

Seba Wezaretê Karê Dîyanetî vengdayîş!

 

Muazzeze tewr peyîn qalîkerdişê xo de vera hêrişê goristanan ê menga Remezanî de zî dewam kenê veng da wezaretê karê dîyanetî û vat: "Nê hêrişê ke hetê tu bawerî ra nênê qebulkerdene, ganî wezaretê Dîyanetê zî vera nê bêveng nêmano."