Fîlîz Zeyrek

 

MERSÎN - Dapîra hepsîyo bi nameyê Mustafa Koço ke Zîndanê Tîpa Tyî yê Hûmara 1. yê Tarsusî de tepişte yo û nêweşê zerrî yo Berîtan Koçe wina va: “Torinê mi va ‘Çend rojî yo laşê mi zêde germ beno û qirrika mi dejena.’ Torinê mi her çiqas ke waştişname bido zî ci nêberdî nêweşxane ya zî revîrî.”

 

Dapîra hepsîyo bi nameyê Mustafa Koço 18 serrî ke 2 aşmî yo Zîndanê Tîpa Tyî yê Hûmara 1. yê Tarsusî de tepişte yo û nêweşê zerrî yo Berîtan Koçe bi telefon torinê xo reyde pêvînayîşêk pê ard. Mustafayo hepsî telefon de keyeyê xo rê va ‘Çend rojî yo laşê mi zêde germ beno û recefîyena. Qirrika mi dejena û ez nêeşekan nefes bigîra.’ Mustafa telefon de dîyar kerd ke o her çiqas ke waştişname bido zî ci nêberdî nêweşxane ya zî revîrî.

 

‘Nêbenî nêweşxane’

 

Dapîra Mustafa Berîtan Koça 100 serrî qiseykerdişê xo de daye zanayene ke asayîşê canê Mustafa û hepsîyanê bînan çin o û derheqê pêvînayîşo ke Mustafa reyde kerdî înan va: “Çend rojî yo ke leşê ci recefîyeno û qirrika ci dejena. Mustafa nêeşkeno nefes bigîro. Çîyêk bêro serê torinê mi do kam hesab bido. Berpirsîyar dewlet a. Torinê mi nêweşê zerrî yo. Goreyê qalîkerdişan îhtîmalêk zêde bi vîrus kewto. Her çiqas ke waştişname bido zî ci nêberdî nêweşxane ya zî revîrî. No wijdanêko senî yo No seyyewbînanîyêko çawa yo. Tacîzkar û qatilan serbest vera danî û domananê ma zî terkê mergî kenî.”

 

‘Wa bi lez serbest vera bidî’

 

Berîtan Koçe qiseykerdişê xo yê peyênan de wina va: “Ganî hepsîyê sîyasî bi lez serbest bêrî veradayene. Ma nêwazenî cenazeyê domananê ma zîndanan ra bivejîyî. Hirê bira zîndan de yî. Waştişê ma tena asayîş û edalet o. Ez veng dana wezîrîya edaletî. Ez torinê xo meraq kena. Mustafa hema şenik o û ser de zî nêweş o. Ma nêzanî ke rewşa ci senî ya. Tena pêvînayîşêk bi tefelonî mird nêkeno.”