MÊRDÎN - Hepsîyo bi nameyê Mehmet Faruk Ergîno ke zîndanê Tîpê T yê Osmanîye de maneno, dîyar kerd ke gardîyanî erzenê serê koxuşan, bi botanê xo pay danê serê nivînan û pêwa vîrusî tu kenê koxuşan.

 

Semedê vîrusê korona paketa vistişê înfazî ame amadekerdene û hepsîyê sîyasî qanûn de ca nêgirewtî. Coka rîskê zîndanan her ke şono, zêde beno. Seba vîrusî zîndanan de îhlalkerdene heqan zêde beno. Hepsî rewşa xo keyeyanê xo rê neql kenê ke û vanê, şertê giranan de ciwîyenê. Mehmet Faruk Ergîno ke zîndanê Tîpê T yê Osmanîye de maneno, keyeyê xo geyrayo û da zanayene ke tedbîr nînê girewtene. Mehmet Farukî keyeyê xo rê dîyar kerd ke gardîyanî her wext erzenê serê koxuşşan.

 

'Gardîyanî destê xo yê bêlepik danê her ca'

 

Mehmet Farukî wina va: "Maske nêdanê ma, Tena danê gardîyanan. Rojê peyînan de, erzenê serê koxuşan. Gardîyanî bi botanê xo, pay danê serê nivînanê ma. Destê xo yê bêlepik danê her ca. Tay koxuşan de maskeyê xo anê warî û tu kenê. Ma şertê giranan de ciwîyenê. Ma goreyê xo tedbîran gênê la heta ça."

 

'Embazê ma yê ke krîz derbaz kerdî bi rojan dima berdî nêweşxane'

 

Mehmet Farukî dewam de dîyar kerd ke revîran de zî probleman ciwîyenê û wina va: "Embazêko ma nêweş kewtib. Bi rojan nêberdî revîr. Tewr peyîn krîz derbaz kerd û ey berdî nêweşxane. Nika beşê giran de yo. Ma her het ra probleman ciwîyenê."

 

'Bi hezaran dayîkê ke domananê xo fikrîyenê estê'

 

Dayîka Şukrîye Ergîne zî reaksîyon vera pakete da û va: "Ez her roje lajê xo fikrîyena. Seke mi bi hezaran dayîkî estê. Nika çîyêk bi înan bibo, do kam hesabê înan bido. Do ma ra vajê çi. Wa zerrîya tu dayîkêke nêveşo. Wa domananê ma serbest vera bidê."