STENBOL - Buroyê Huqûqî yê Asrinî bale ante gefê Covid-19î ser û pare kerd ke Rayberê PKKyî Abdullah Ocalanî binê rîskêkê pîlî de yo. Buroyî venga CPTyî da ke wezîfeyê xo bîyaro ca.

 

Buroyê Huqûqî yê Asrinî raporêk amade kerd û CPTyî rê erşawit. Rapor de qala rewşa Rayberê PKKyî Abdullah Ocalanî, Omer Hayrî Konarî, Hamîlî Yildirimî û Veysî Aktaşî ameye kerdene.

 

'Abdullah Ocalan rîskêko giran de yo'

 

Dimayê prosesê vîrusê korona dir seba zîndanan endîşeyî zî virazyayî û na babete ser o rapor de ame vatene, ''Zîndanê Îmraliyî de 21 serran o ke Birêz Ocalan helmgirewtişî ra zaf rey nêweş kewtî, na rewşe bîye kronîk. Birêz Ocalanî nêeşkeno şertanê hucreyî ra warê hewayî ra fayde bivîno. Birêz Ocalan semedo ke 71 serre yo û nêweşîyê ci yê kronîkî estê kategorîyê rîskê Covid-19î de yo."

 

'Zanayîş nêame dayene'

 

Rapor de nê zanayîşî zî ameyî dayene: "Hakîmîya Înfazî ya Bursa ya 2. waştişê ma red kerdî. Bira redkerdişî ya 26.03.2020î, 6ê nîsana 2020î de pê rayîrê dozgerîye resaye ma. Waştişê ma nê bîyî: vera vîrus wa tedbîr bêro girewtene, eke vîrus dekewo zîndan mudaxeleyo tibbî bêro girewtene û ma rê zanayîş bêro dayen. Nê weşatişê ma pê bahaneya 'nê çîyî çarçewa wezîfeyê hakîmîya înfazî de yê' ameyî redkerdene. Waştişê heqê pêvînayîşî û heqê telefonî zî ameyî redkerdene.''

 

CPT se bikero?

 

Buroyê Huqûqî yê Asrinî peynîya raporî de nê çîyî CPTyî ra waştî:

 

''*Ma komîteya şima ra wazenê ke pê Wezaretê Edaletî, Mudirîya Pêroyî ya Zîndanan û selahîyetdaran hukmatî reyde têkilîye ronê û rewşa nikayêne bizanê. Seba ke vîrusê Korona nêreso Zîndanê Îmraliyî selahîyetdaran ra biwazê ke tedbîran bigêrê.

 

*Na çarçewe de bikerê ke tedbîrê lezabezî zîndanan de bêrê caardene ke Komeleya Heqanê Merdiman (ÎHD), Weqfa Heqanê Merdiman a Tirkîya (TÎHV), Komeleya Huqûqnasanê seba Azadîye (OHD), Komeleya Huqûqnasan ê Hemdeman (ÇHD), Sendîkaya Kedkaranê Xizmetê Komelkî û Weşîye (SES), Komeleya Komelê Sivîlî ya Sîstemê Înfazê Ceza (CÎSST) 30ê adara 2020î de rayaumûmîye reyde pare kerdî.

 

*Cezaya dîsîplînî bêra wedaritene yan zî goretê huqûqî bêra taloqkerdene.

 

*Seba ke keye û avûkatî bi hawayêk lezabezî bieşkê pêvînayîş bikerê game bêra eştene."

 

*Seba ke keye û avûkatî bi hawayêk lezabezî bieşkê heqê xo yê qiseykerdişê pê telefonî ra fayde bivînê, têbigêrê.

 

*Seba ke caardişê nê waştişan zaf girîng ê heta ke asayîşê cuye û weşîya muracatkeran bêrê caardene bi hawayêkê bitesîrî proses teqîb bikerê.''