ÎZMÎR - Azîze Aksoye dîyar kerde ke mêrdeyê ci Abdulkahhar Aksoyî 28 serrî yo ke zîndan de yo û reaksîyon vera paketa ke hepsîyê sîyasî nêkerdê ci de da. Azîze wina va: "Çete, dizd û kiştoxî vejîyayî. La wexto ke babete yena serê Kurdan, ker û lal manenê. Ma zîndanan de tedbîr ney, tehlîyeyan wazenê."

 

Tirkîya de semedê Vîrusê Korona hûmara kesê ke testê înan pozîtîf vejîyayo 86 hezar û 306, 2 hezar û 17 kesî zî cuya xo vindî kerd. Vilabîyayîşê vîrusî bi lezabez dewam keno û qanûnê înfazî ke 13ê Nîsane de derbaz bi zî hepsîyê sîyasî ci de ca nêgînê. Merdimê hepsîyan nê ra bi endîşeyîn ê.

 

Hepsîyo bi nameyê Abdulkahhar Aksoyî ke nêweşê hîpertansiyon, KOAHo kronîk, diyabetî yo, zîndanê Odemîzî yê Îzmîrî de tepişte yo. Cinîya ci Azîze Aksoye semedê hepsîyan vengdayîşê, 'ganî serbest bêrê veradayene' kerd.

 

'Semedê şarê xo têkoşîn kerd'

 

Azîze dîyar kerde ke dimayê ke mêrdeyê ci ameyo tepiştiş, 1993 de Mêrdînî ra şirawitî Îzmîr û ê zî mecbur mendê ke keyeyê xo berê Îzmîr û va: "Mêrdeyê mi seke Kurdêke semedê şarê xo têkoşîn kerd. Coka ame tepiştene. 28 serrî verê, ez bi 5 domananê xo dir menda. Tewr qijê mi 3 serrî bi."

 

'Mi têkoşînê mêrdeyê xo dewam kerd'

 

Azîze da zanayene ke ê têkoşînê xo dewam kenê û têkoşînê mêrdeyê xo dewam kerda û va: "Ma her wext ey dir bî. Semedo ke mêrdeyê mi rûmetê Kurdan, xo ver da. Semedê edaletî xo ver da. Na babeta Kurd yan zî Tirkan nêbî. Na babeta heqî bî. Ma şaristanê xo ra, ma mintiqaya xo ra hes kerdêne. Ma semedê ey ameyî tîya. Omidê înan tena ma yê. Coka ma koçê şaristanêke ma nêzanayîne kerd."

 

'Asayîşê hepsîyê sîyasî xemê înan nîyo'

 

Azîze dewam de nê çî va: "Pêwa heme zor û zehmetîyan ma dest fikrê xo ra vera nêda. Nika ma vera vîrusî têkoşîn kenê. Semedê zîndanan ma bi endîşeyîn ê. Rojê vîyarte de qanûnê înfazî zîndan ra derbaz bi. Ma vera nê zaf bi hêrs ê. Mêrdeyê mi dir zaf nêweşî estê. Zîndanî lêşin û baş nîyê. Nika dizdan û tecawizkaran serbest vera dayî. La asayîşê ganê hepsîyan xemê înan nîyo. Ne maske, ne lapik û ne zî hacetê pakitî danê înan. Mêrdeyê mi xora bi 28 serrî yo tepişte yo. Ma her wext omid kerdêne ke rojêk serbest bêro veradayene. Labelê sîyasîyan terkê mergî kenê, wexto ke babete yena serê Kurdan, ker û lal manenê."