AMED - Dayîka hepsîyê bi nameyê Azîz Tufanî ke zîndanê Amedî de tepişte yo, Yesure Tufane va, ganî seba hepsîyê sîyasî paketêka newe bêra vetene û va: "Ma sey dayîkan seba domananê xo amade yê. Hewce bikero ma do zîndan û meclîs de roşê."

 

3in Paketa Hukmî ya Heyetê Pêroyî yê Meclîsî bi rayanê AKP û MHPyî derbaz bî. Hepsîyê sîyasî tede ca nêgirewtî û serê nê de reaksîyonê keyeyan zî dewam keno. Qanûnê ke tahlîye 90 hezar hepsîyê edlîyan rê pêşnîyaz keno, dimayê ke ame qebulkerdene tahlîyeyî zî dest pêkerdî. Nê prosesê ke vîrusê korona tesîr serê pêro welatî de kerdo, hepsîyê sîyasî zere de ameyî tepiştene û coka hetê raya pêroyî ra pakete rastê reaksîyonan yena. Hepsîyo bi nameyê Azîz Tufano ke zîndanê Tîpê D yê Amedî de maneno, dayîka ci Yesure Tufane da zanayene ke lajê ci şertê û mercê giran de yeno tepiştene û va, na pakete qebul nêkenê.

 

'Seba pawitişî tu çîyêk nêdanê'

 

Yesure dîyar kerde ke lajê ci Azîz, 3 serrî û nîm zîndanê Tîpê D yê Amedî de yo û wina dewam kerde: "Şert û mercê ci qet baş nîyê. Ez bi telefon ey dir qalî kena. Şert û mercanê înan pers kena. Lajê mi va, 'eke zerrîya înan biwazo, verdenê hacetê pakitî bi pereyê xo bigîrê. La kêfê înan nêwazeno, înan zî nêdanê ma.' Werdê 5 kesan danê, 10 kesan. Awa germine vera nêdanê. Awe serdêne zî ge-ge birnenê. Maske nêdanê. Semedo ke hepsî xo bipawê, tu çîyêk nêdanê. Binê şertê giran de yê. Werdê awin de seba ke salçe kenê ci, nêeşkenê biwerê. Vatêne, do heqê pêvînayîşê telefonî yê bi dîmen bidê û hepsîyan zî îdareyî ra pers kerdo. Îdareyî zî vato, 'şima rehet vinderê, ma do bidê şima la şima rehet nêvinderê ma nêdanê şima'."

 

'Hewce bikero ma do verê zîndanan de roşê'

 

Yesure tewr peyîn wina va: "Domananê ma se kerdo? Ma nê tehdîdan qebul nêkenê. Zîndanan de tu tedbîr nîno girewtene. Maske dayê tena çend hepsîyan. La dewamê ci nêardê. Domanê ma bi îmkananê xo, xo pawenê. La do heta ça xo bipawê. Ma nê qebul nêkenê. 90 hezarî hepsîyê edlî serbest vera dayî. Yê sîyasî vera nêdayî. Ma na rewşe şermezar kenê. Ma dayikî wayîrê domananê xo vejîyê. Wa paketêka newe bêro vetene. Eke hewce bikero ma dayîkî ma do verê meclîs û zîndanan de roşê."