Zeynep Durgut- Şehrîban Aslan

 

AMED - Salîha Aslana ke ciwîyayîşê apartmane seba xo astengî nêvînena, vana ke ganî cinî her rewşe de alternatîfê xo awan bikerê.

 

Cinîyê ke goreyê şert û mercan alternatîfê xo awan kenê, tu astengîyan nas nêkenê û bi nê metodî cuya xo bi mana kenê. Qezaya Peyasî ya Amedî de Salîha Aslane (46) ke apartmanêke de ronişnena, yew ê cinîyanê ke xo rê alternatîfê xo awan kena ya. Her çiqas Salîhaye apartmanêke de bo zî her serre, bi ameyîşê wisarî dir toximê fêkî vildanan de ramnena û dima ra bena dewe. Saliha ke bi serran o vildanan de toxim dana ro, dîyar kerde ke cuyayîşê ci apartmane, qetî têkiliyê ci bi xoza dir nêbirnayo û va ke ganî cinî her rewşe de alternatîfê xo awan bikerê.

 

‘Ez her serre toxim dana ro’

 

Salîha ard ziwan ke bi serran o vildanan de toxim dana ro û va: “Ez bi serran o vildanan de toxim dana ro û kena şitil. Gama ke şitlê min ê fêkî pîl benê, ez bena dewa xo. Wexto ke mi bi dest ramitişê toximê sebzeyan kerd, semedo ke ez apartmane de bîya derûdorê mi, reaksîyon ramojnayî. Mi ra vatêne, ‘çi hewceyo ti ramena?’ Mi goşdarîya kesî nêkerd. Mi par toximê xo ramitî û sebzeyêke resayî, mi zimistanî ci ra feyde girewt. Eynî wextî de kesê ke derûdorê mi de bî, înan zî şitlanê mi ra fetde girewt.”

 

‘Gama ke hawa bîne serd mi berdêne zere’

 

Salîha bale ante serê janê koronayî zî û va seba ke par sebzeyan ramitîbî, hewceyê girewtişê sebzeyan nêkerdo û wina va: “Mi şitlê xo emsar zî bi baldarî pîl kerdî. Gama ke hawa serd bî, mi înan berd zere û gama ke tîjî vejîyayîne, mi berdêne hewşe. Eke na nêweşîye peynî nêba û şîyayîşê dewe çinbo, ez o toximanê xo vildananê pîlan de biçînî û hewşe de biewnî înan ra. Ez do no hawa zî biceribnî. La omidê mi tena oyo ke na nêweşîye lez biqedîya.”