Zeynep Durgut- Şehrîban Aslan 

 

RIHA - Hemsereka HDPyî ya Rihayî Emîne Çetînere derheqê Kampanyaya ke dayî destpêkerdene de qisey kerde. Emîne, dîyar kerde ke ê do bi nê kampanya sere de verê cinîyan û dima ra zî bi komelî dir piştdayîşê xo girs bikerê.

 

Janê vîrûsê koronayî (COVÎD-19) ra semedo ke bi şarî dir piştdayîş de bê, Partîya Demokratîkî ya Şaran (HDP) dest bi kampanyaya ‘hemkeyeyî’ kerd. Kampanya her cayê Tirkîya de dewam kena. Çarçewaya kampanya de bi komîsyonê ke qezayan de ameyî awankerdene, keyeyî yenê tespîtkerdene û înan rê piştdayîşê madî û manevî yenê kerdene. Goreyê komîsyonê ke Rihayî de ameyo awankerdene 185 keyeyî ameyê tespîtkerdene û heta nika xo resnayê 207 keyeyan. Hemsereka HDPyî ya Rihayî Emîne Çetînere, va ke, ê nê rojan de bi xurtkerdene kampanya, piştdayîşê bi şarî dir hîna hîra kenê.

 

‘Ma hewl danê ke xo biresnê 500 keyeyan'

 

Emîne bale ante serê xebatanê kampanyaye û wina qisey kerde: “Ma seke rêxistinê Rihayî, dest bi kampanyaya xo kerd. Ma heta nika 185 hemkeyeyî peyda kerdî û amancê ma 500 keye yê. 207 keyeyan rê hetkarîya werdî ame kerdene. Ma hewl danê ke xo biresnê 500 keyeyan. Ma nê wareyî de piştdayîşêko zaf cidî şarî ra gênê. Ma bi tu hawayî têkilîyê xo bi keyeyan dir qut nêkenê. Ma hewl danê ke her het ra û bi taybetî hewcedarîyê cinîyan bi ca bîyarê. Seke her xebatan na kampanya de zî ma wazenê ke piştdayîşê xo yê bi cinîyan dir zêde bikerê. Ma do rojê ameyox de piştdayîşê xo hîna zêde bikerê.”

 

‘Ma têkilîyê xo bi cinîyan dir qut nêkenê’

 

Emîne dewamê qiseykerdişê xo de wina va: “Ma sey prosesê bînan, nê prosesî de zî kîşta şarê xo de yê. Semedo ke partîya ma partîyêka têduştî wazena ya. Her roje şîdet û qetilkerdene vera cinîyan zêdîyenê. Prosesê karantîna de şîdetê vera cinîyan, sera 27 zêde bi. Semedo ke ma şîdet vindarê, ma têkilîyê xo bi cinîyan dir qut nêkerê."

 

'Piştdayîşê ma do ma bi hêz bikero'

 

Emîne tewr peyîn qiseykerdişê xo de ard ziwan ke Rihayî de bêtedbîrî esto û wina va: “Rihayî de bêtedbirîyêko pîl esto. Ma nê çî vînenê û ma tecrube kenê. Seke xebatkarê HDPyî, ma do xebata xo bêmabên dewam bikerê. Ma bawer kenê ke ma do xebata xo de serkewte bibê. Piştdayîşê ma do ma hêzdar bikero.”