AMED - Nazîme Yureka ke di domanê ci zîndan de yê û nêweş ê, reaksîyon vera qanûnê înfazî da û vat: “Kes seba rewşa domananê ma çîyêk nêkeno. Wa êdî merdiş û operasyonan bidê vindarnayene. Ma wazenê berê zîndanan bêrê akerdene.”

 

Reaksîyonê vera 3in paketa muhakemeyî ê meclîsî ra derbaz bî dewam kenê. Qanûno ke hepsîyê sîyasî ci de ca nêgînê, semedê 90 hezar hepsîyê edlî rayîrê tahlîye akeno. Bi taybet keyeyê hepsîyan, sazgehê komelê malbatên sivîlan reaksîyon ramojnayî û rexne kerdî. Hetê wezaretî ra ame vatene ke 3 hepsî, vîrusê korona ra cuya xo vindî kerdê. Dimayê nê bala her kesî serê hepsîyê sîyasî û nêweşê ke binê rîskê de yê yo.

 

Nazîme Yureke ke di domanê ci zîndan de yê û nêweş ê, reaksîyon ramojna. Lajê ci Ahmet Yurek, Zîndanê Tîpê F yê Kandirayî yê Kocaeliyî de yo, lajê aye bîn Ertan Yurek zî Zîndanê Tîpê T yê Bunyanî yê Qeyserî de yo.

 

‘Her çî reyna yeno sereyê feqîran’

 

Nazîmeye wina vat: “Lajêk mi 22 serrî, lajê min o bîn zî 9 serrî yo tepişteyê. Her di zî nêweş ê. Kenanî rê cezaya muebetî ameye dayene. 22 serrî yo tepişte yo. Kandîra de yo. Nêweşê qelb, koas, zerik, va esto. Ertanî zî 16 serrî girewte yo û Bunyan de tepişte yo. Ertan zî nêweşê şekirî yo, milê ci de fitq esto. Hêzê ci çin o. Her wext lerzeno. Nika vîrus esto. Yê ke hêzê înan bibo eşkenê xo ver bidê. La reyna her çî bi sereyê feqîran de yeno. Gerek hepsîyê nêweşî serbest bêrê veradayene. Wa Kenan û Ertanî mi serbest bêrê veradayene.”

 

‘Wa têduşt têbigeyrê’

 

Nazîme dîyar kerde ke çimê dayîkan, rayîrê domananê înan de yo û vat: “Omidê ma qanûnan ra şikya. Her wext omidê ma wina ameyo şiknayîş. Domanê mi reyna zere de mendî. Dewlete ma reyna xapênayî. Tîryakî, kiştoxî, dizdî ameyî veradayene. Hepsîyê sîyasî reyna zere de mendî. Wa têduşt têbigeyrê. Wa her kes qanûn ra feyde bigîro. Ma wazenê ke domanê ma zî serbest bêrê veradayene. Domanê ma tena ziwan û herra xo pawitî. Çîyêk xirab nêkerdî.”

 

‘3 serrî yo ke ma her ke vanê aştî ê vanê şer’

 

Nazîmeye tewr peyîn qalîkerdişê xo de wina vat: “30 serrî yo her ke ma vanê aştî, ê vanê şer. Ma têduştî wazenê, ê şer wazenê. Ma têduştî wazenê, ê şer wazenê. Êdî bes o. Zerrîya dayîkan xo ver nêdana. Ez veng dana wezîrî dade û serekkomar î. Wa qalê yewîye û aştîye bikerê. Wa efûyêk pêroyî vejê, domanê ma vera bidê.”