MÊRDÎN - Hemşaradara Nisêbînî ya verê Sara Kaya ke tepişte ya, wayanê ci qisey kerdî û dîyar kerdî ke Sara nêweşa astimî ya û vatş: “Hepsî do şertê zîndanî de senîn biciwîyê. Do xo senîn bipawê. Wa hepsî serbest bêrê veradayene. Wa kes nêmiro.”

 

Hemşaradara Nisêbînî ya verê Sara Kaya ke Çeleyê 2017î de ameye tepiştene, 4 serrî yo tepiştî ya û zîndananê Mêrdîn, Wanî de mende û nika zî zîndanê cinîyan ê Tarsûsî de ya. Saraye pêvînayîşê telefonî de dîyar kerde ke şertê zîndanî zaf zehmet ê. Merdimê Sara zî reaksîyon ramojnayî û vatî, Sara nêweşa astimî ya û ganî pêro hepsî serbest bêrê veradayene.

 

‘Çîyêk bibo do kam hesabê ci bido’

 

Waya Sara, Ayfer Yildirime da zanayîş ke 4 domanê Sara estê û bi serran o ke bêhuqûqî yena tepiştene û vat: “Çar domanê waya mi estê. Sucê aye çin o la reyna zî tepiştî. Nêweşa astimî ya. Yewin sucê aye verê şarê xo de bî. Domanê ci zaf berîya dayîka xo kenê. Her wext wazenê aye bivînê. Ma wazenê hepsîyê sîyasî zî serbest bêrê veradayene. Wa merdimanê ma terkê mergî nêkerê. Wa pêro çî têduşt bêro kerdene.”

 

‘Tarsus de tedbîrêk zî nêameyo girewtene’

 

Waya aye bîne Ayten Akdogane zî vat, pêvînayîşê peyîn yê telefonî de Saraye dîyar kerda ke rewşa zîndanan zaf xirab o û vat: “Semedê vîrusî tedbîrêke zîndanan de nêameyo girewtene. Bi hezaran hepsî bê asayîş ameyî verdayene û tacîzkar û tecawizkaran serbest vera dayî. No çîyêk ameyo kerdene bêhuqûqî yo. Waya mi nêweş a. Eke nê vîrusî bikewo do kam hesabê ci bido? Pêvînayîşê peyîn de vat, tedbîrêke nêameyo girewtene. Tarsûs xora cayêk zaf xirab o. Pak nîyo. Wa hepsî serbest bêrê veradayene.”